दिंडोरी (नाशिक): कादवा सहकारी साखर कारखान्याने चालू गळीत हंगामात ३५ दिवसांत १,००,१४१ मेट्रिक टन ऊसाचे विक्रमी गाळप केले आहे. साखर उतारा १०.४३ टक्के मिळला असून १ लाख ४ हजार ५७५ क्विंटल साखर उत्पादन झाले आहे.
कारखान्याचा इथेनॉल प्रकल्पही पूर्ण क्षमतेने सुरू असून १०,७३,३१२ लिटर रेक्टिफाईड स्पिरिट आणि ५१,०४० लिटर इंप्युअर स्पिरिट उत्पादन होत ६,३३,५५३ लिटर इथेनॉल निर्मिती झाली आहे. कमी दिवसात जास्तीत जास्त गाळप करण्याच्या उद्दिष्टातून कारखाना प्रशासन नियोजन करत आहे. कारखान्याच्या भवितव्यासाठी अधिक ऊस गाळप करणे आवश्यक आहे. कार्यक्षेत्रात ऊस टोळ्या वाढवण्यात येत असून उसतोडीचेही नियोजन करण्यात आले आहे. ऊसतोड कार्यक्रमानुसार कार्यवाही सुरू आहे.
मार्चअखेर सर्व उसतोड पूर्ण करण्याचे नियोजन करण्यात आले आहे. कारखान्याचे सीडफार्ममध्ये उसाच्या विविध जातीचे रोपे शेतकऱ्यांच्या मागणीनुसार बनवण्यात येत असून उधारीने रोपांचे वाटप करण्यात येत आहे. कंपोस्ट खत निर्मिती करण्यात आली असून उधारीने खत विक्री सुरू आहे. कादवा सहकारी साखर कारखाना भविष्यातही सक्षमपणे सुरू राहण्यासाठी सर्व सभासदांनी जास्तीत जास्त ऊस लागवड करावी. आपल्या ऊस कादवा कारखान्यालाच पुरवावा असे आवाहन कादवाचे चेअरमन श्रीराम शेटे यांनी केले आहे. यावेळी व्हा. चेअरमन शिवाजीराव बस्ते, सर्व संचालक, कार्यकारी संचालक व सर्व खातेप्रमुख उपस्थित होते.
