नाशिक : पुढारी वृत्तसेवा
शहरासह देशातील विविध भागांतील नागरिकांची तब्बल २५ लाख ७९ हजार ४८७ रुपयांची सायबर फसवणूक झाल्याचा प्रकार उघडकीस आला असून, या प्रकरणी सायबर पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, १ जानेवारी २०२५ ते आजपर्यंतच्या कालावधीत विविध बँकांमधील एकूण १८ बँक खात्यांचा वापर करून देशातील विविध भागांतील नागरिकांची वेगवेगळ्या बहाण्यांनी आर्थिक फसवणूक करण्यात आली.
फसवणुकीतून जमा झालेली २५ लाख ७९ हजार ४८७ रुपयांची रक्कम या खात्यांद्वारे फिरवण्यात आल्याचे तपासात समोर आले आहे. या व्यवहारांमध्ये सेंट्र्ल बँक ऑफ इंडिया, सिटी युनियन बँक आणि कॅनरा बँक यांसह विविध बँकांतील खात्यांचा वापर झाल्याचे निष्पन्न झाले आहे.
प्रवीण मधुकर वेताळ (वय ५२) यांनी याबाबत फिर्याद दिली आहे. या प्रकरणाचा तपास वरिष्ठ पोलिस निरीक्षक सुशीला कोल्हे यांच्या मार्गदर्शनाखाली सुरू आहे. सायबर पोलिसांकडून संबंधित बँकांकडून व्यवहारांचा तपशील मागवण्यात आला असून, पैशांचा अंतिम लाभार्थी कोण आहे,
रक्कम कोणत्या खात्यात वळवण्यात आली आणि या रॅकेटमध्ये आणखी कोणाचा सहभाग आहे, याचा तपास सुरू आहे. तांत्रिक पुरावे, बँक व्यवहारांची माहिती आणि डिजिटल ट्रेलआधारे आरोपींचा शोध घेण्यात येत आहे.
आरोपींचा यापूर्वीचा गुन्हेगारी इतिहास अथवा अटकेबाबत अद्याप कोणतीही नोंद उपलब्ध नसल्याचे पोलिसांनी सांगितले. नागरिकांनी ऑनलाइन व्यवहार करताना सतर्क राहण्याची आवश्यकता असल्याचे वरिष्ठ पोलिस निरीक्षक सुशीला कोल्हे यांनी सांगितले.
अनोळखी व्यक्तीकडून आलेले मेसेज, लिंक, क्यूआर कोड किंवा कॉलला प्रतिसाद देऊ नये. ओटीपी, बँक खाते, एटीएम कार्ड गोपनीय माहिती देऊ नये. फसवणूक झाल्यास १९३० या हेल्पलाइनवर संपर्क साधावा, असेही स्पष्ट केले आहे.
