नाशिक : पुढारी वृत्तसेवा
भोंदू अशोक खरात प्रकरणात अडचणी वाढत असताना त्याची पत्नी कल्पना खरात ही अजूनही फरार असून, पोलिसांना चकवा देत असल्याचे समोर आले आहे. दरम्यान, महिलांच्या लैंगिक शोषणाच्या प्रकरणांत अशोक खरातविरोधातील तक्रारी दिवसेंदिवस वाढत असल्याने तपास यंत्रणांवरही ताण वाढत आहे.
कल्पना खरात हिचा शोध घेण्यासाठी शिर्डी तसेच नाशिक पोलिसांचे विशेष पथक कार्यरत आहे. मात्र, ती अद्याप हाती लागलेली नाही. २ एप्रिलला दुपारी पोलिसांनी गोविंदनगर परिसरातील कर्मयोगीनगर येथील तृप्तबाला बंगल्यावर छापा टाकला.
या ठिकाणी कल्पना खरात लपून बसल्याची माहिती मिळाल्यानंतर ही कारवाई करण्यात आली होती. मात्र, धाडीत ती आढळून आली नाही.
दरम्यान, शिर्डी येथील भूखंड बळकावण्याच्या प्रकरणात अशोक खरातसह त्याची पत्नी कल्पना खरात हिच्याविरुद्ध सावकारी कायद्यांतर्गत गुन्हा दाखल करण्यात आला आहे. या प्रकरणात इतर २ आरोपींना पोलिस कोठडी सुनावण्यात आली आहे.
कल्पना खरात ही या प्रकरणातील महत्त्वाची आरोपी मानली जात असून, तिची चौकशी होणे अत्यावश्यक असल्याचे पोलिसांचे मत आहे. तिच्या फरारामुळे तपासात अडथळे निर्माण होत आहेत. दरम्यान, पोलिसांनी विविध ठिकाणी शोधमोहीम सुरू ठेवली आहे. लवकरच कल्पना खरातला अटक करण्यात येईल, असा विश्वास व्यक्त करण्यात येत आहे.
