नाशिक : पुढारी ऑनलाइन डेस्क | राष्ट्रवादी काँग्रेस पक्षाचे (अजित पवार गट) ज्येष्ठ नेते नाराज असलेले छगन भुजबळ यांना अखेर मंत्रिपद मिळाले आहे. मंगळवार (दि.20) आज रोजी राजभवनात सकाळी 10 वाजता ते मंत्रिपदाची शपथ घेणार आहेत.
धनंजय मुंडे यांच्या राजीनाम्याने रिक्त झालेल्या जागी छगन भुजबळ यांची निवड करण्यात आली आहे. भुजबळांना धनंजय मुंडे यांचेच अन्न आणि नागरी पुरवठा मंत्रालय दिले जाणार आहे. यापूर्वी मंत्रिमंडळातून डावलल्याने छगन भुजबळ नाराज असल्याचे चर्चा होती. त्यानंतर ओबीसी साठी आवाज उठवणारे भुजबळ यांना सबुरीचा सल्ला देण्यात आला होता. छगन भुजबळ यांना मंत्रिमंडळात स्थान देऊन त्यांची नाराजी दूर केली जाणार आहे. विशेष म्हणजे धनंजय मुंडेंच्या रिक्तपदी दुसऱ्या ओबीसी चेहऱ्याला संधी दिली जाणार आहे.
छगन भुजबळ यांचा शपथविधी सोहळा मंगळवार (दि.20) आज रोजी राजभवनात होणार असून यावेळी राज्याचे मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार यांच्यासह अनेक महायुतीचे नेते उपस्थित राहणार आहेत.
छगन भुजबळांच्या मंत्रिपदामुळे नाशिकच्या पालकमंत्री पदाचा राष्ट्रवादीचा दावा अधिक मजबूत होणार आहे. नाशिक जिल्ह्यातून मंत्रिपदाची शपथ घेणारे छगन भुजबळ राष्ट्रवादीचे तिसरे मंत्री ठरतील. नाशिक जिल्ह्याला भुजबळांच्या रुपात चौथे मंत्री मिळणार असून दादा भूसे वगळता इतर दोन माणिकराव कोकाटे आणि नरहरी झिरवाळ राष्ट्रवादीचेच मंत्री आहेत. भुजबळांच्या मंत्रिपदामुळे नाशिक आणि रायगड पालकमंत्री पदाचा वाद मिटणार का ? याकडे राजकीय वर्तुळाचं लक्ष लागले आहे.
