मालेगाव : पुढारी ऑनलाइन डेस्क | मालेगावात साध्वी प्रज्ञासिंह यांच्या उपस्थितीत हिंदू संत संमेलन भरवले जात आहे. या संमेलनास हायकोर्टाची परवानगी मिळाली असून कायदा व सुव्यवस्थेचं कारण देत पोलिसांनी ही परवानगी नाकारली होती. मात्र आता उच्च न्यायालयानेच ही परवानगी दिली आहे. त्यामुळे गुढीपाडव्या मुहुर्तावर मालेगाव येथे हिंदू संत संमेलन भरविले जाणार आहे.
मालेगाव बॉम्ब स्फोटातील आरोपी साध्वी प्रज्ञा सिंह ठाकूर यांच्या प्रमुख उपस्थितीत मालेगावात होणाऱ्या विराट हिंदू संत संमेलनाला मुंबई उच्च न्यायालयाने सशर्त परवानगी दिली आहे. मालेगावात प्रज्ञा सिंह ठाकूर यांच्या उपस्थितीत 30 मार्चला गुढीपाडव्याच्या निमित्ताने हिंदू संत संमेलन होत आहे.
कायदा आणि सुव्यवस्थेचा विचार करता उच्च न्यायालयाने काही अटींवर संमेलनास परवानगी दिली आहे. साध्वी प्रज्ञा यांना 'हिंदूवीर' पुरस्कार देण्यात येणार आहे. कायदा आणि सुव्यवस्थेचा प्रश्न निर्माण होणार नाही. प्रक्षोभक भाषण केले जाणार नाही. तसेच सायंकाळी 5 वाजेच्या आत कार्यक्रम संपवण्याची हमी आयोजकांनी पोलिसांना लेखी स्वरूपात द्यावेत असे निर्देश देण्यात आले आहेत.
गुढी पाडव्याच्या निमित्ताने होणाऱ्या संमेलनात साध्वी प्रज्ञासिंह ठाकूर यांना हिंदू वीर पुरस्काराने सन्मानित करण्यात येणार आहे. कायदा-सुव्यवस्थेचे कारण देत पोलिसांनी या कार्यक्रमाला परवानगी नाकारली होती, परंतु आयोजकांनीच उच्च न्यायालयात धाव घेतल्यानंतर उच्च न्यायालयाकडून ही सशर्त मंजुरी मिळाली असून आयोजकांनी आता कार्यक्रमाची जय्यत तयारी सुरू केली आहे.
