Navapur Worker Death
नंदुरबार : मंडप उभारणीच्या कामासाठी वापरण्यात येणारे अवजड जनरेटर एका ठिकाणाहून दुसऱ्या ठिकाणी हलविताना ताबा सुटून अंगावर कोसळल्याने २७ वर्षीय तरुण मजुराचा जागीच मृत्यू झाला. ही घटना नवापूर तालुक्यातील खांडबारा येथे रात्री घडली.
या घटनेनंतर संतप्त नातेवाईक व समाजबांधवांनी मृतदेह जनरेटर मालकाच्या घराबाहेर ठेवून ठिय्या आंदोलन केले. संबंधितावर कारवाई करून न्याय मिळेपर्यंत अंत्यसंस्कार न करण्याची भूमिका कुटुंबीयांनी घेतल्याने परिसरात काही काळ तणावाचे वातावरण निर्माण झाले. अखेर पोलिस व ग्रामस्थांच्या मध्यस्थीनंतर नातेवाईकांनी मृतदेह ताब्यात घेतला.
मिळालेल्या माहितीनुसार, खांडबारा येथील रतन अशोक कसबे (वय २७) हा मुनाफ पिंजारी यांच्याकडे मंडप उभारणीचे मजुरीचे काम करीत होता. रात्री कामाच्या ठिकाणी ठेवलेले अवजड जनरेटर दुसऱ्या ठिकाणी हलविण्याचा प्रयत्न सुरू असताना त्याचा ताबा सुटला. त्यावेळी जनरेटर थेट रतन कसबे यांच्या अंगावर कोसळले. त्यामुळे ते जनरेटरखाली दबले गेले.
घटना लक्षात येताच ग्रामस्थांनी घटनास्थळी धाव घेत जनरेटर उचलून रतन यांना बाहेर काढण्याचा प्रयत्न केला. मात्र, गंभीर जखमी झाल्याने त्यांचा जागीच मृत्यू झाल्याचे निदर्शनास आले.
दरम्यान, घटनेची माहिती मिळताच रतन यांच्या नातेवाईकांसह समाजबांधव घटनास्थळी दाखल झाले. त्यांनी मृतदेह जनरेटर मालक मुनाफ पिंजारी यांच्या घराबाहेर आणून ठेवला. संबंधित मालकावर कारवाई करावी आणि कुटुंबाला न्याय मिळावा, अशी मागणी करीत नातेवाईकांनी ठिय्या आंदोलन सुरू केले. न्याय मिळेपर्यंत मृतदेहावर अंत्यसंस्कार करणार नसल्याचे त्यांनी स्पष्ट केले.
रतन कसबे हे मजुरी करून कुटुंबाचा उदरनिर्वाह करीत होते. त्यांच्या पत्नी गर्भवती आहेत. मात्र, त्यापूर्वीच रतन यांच्या मृत्यूने कुटुंबावर दुःखाचा डोंगर कोसळला आहे. कुटुंबाचा प्रमुख आधार हरपल्याने हळहळ व्यक्त होत आहे. पोलिस व ग्रामस्थांच्या मध्यस्थीनंतर नातेवाईकांनी मृतदेह ताब्यात घेतला.
