Umala Kandari Road Accident
जळगाव : जळगाव तालुक्यातील उमाळा-कंडारी रस्त्यावर शालेय विद्यार्थ्यांना घेऊन जाणाऱ्या रिक्षाचा भीषण अपघात होऊन गंभीर जखमी झालेल्या नववीतील विद्यार्थ्याचा मंगळवारी (दि. १३) सकाळी उपचारादरम्यान मृत्यू झाला. अर्जुन प्रल्हाद कोळी (वय १६, रा. कंडारी, ता. जळगाव) असे मृत विद्यार्थ्याचे नाव आहे. या अपघातात रिक्षाचालकासह अन्य १० विद्यार्थी जखमी झाले होते. अर्जुनच्या मृत्यूमुळे कंडारी गावावर शोककळा पसरली असून, कोळी कुटुंबावर दुःखाचा डोंगर कोसळला आहे. संबंधित रिक्षाचालकाविरोधात गुन्हा दाखल करण्याची प्रक्रिया सुरू असल्याची माहिती आहे.
अर्जुन कोळी हा उमाळा येथील माध्यमिक विद्यालयात नववीच्या वर्गात शिक्षण घेत होता. नेहमीप्रमाणे तो अन्य विद्यार्थ्यांसोबत रिक्षाने शाळेत जात असताना उमाळा-कंडारी मार्गावर हा अपघात घडला. चालकाचे रिक्षावरील नियंत्रण सुटल्याने रिक्षाला भीषण अपघात झाला. या दुर्घटनेत रिक्षाचालकासह १० विद्यार्थी जखमी झाले.
अपघातानंतर सर्व जखमींना तातडीने उपचारासाठी रुग्णालयात दाखल करण्यात आले. अर्जुनला गंभीर दुखापत झाल्याने त्याची प्रकृती चिंताजनक होती. डॉक्टरांकडून उपचार सुरू असतानाच मंगळवारी सकाळी सुमारे आठ वाजता त्याची प्राणज्योत मालवली. शाळेत जाण्यासाठी घराबाहेर पडलेल्या अर्जुनचा असा दुर्दैवी अंत झाल्याने परिसरात हळहळ व्यक्त होत आहे.
या अपघातात अर्जुनचा चुलत भाऊ कल्पेश कोळी हादेखील जखमी झाला असून, त्याच्यावर उपचार सुरू आहेत. अर्जुनचे वडील शेती आणि मजुरी करून कुटुंबाचा उदरनिर्वाह करतात. अत्यंत प्रतिकूल आर्थिक परिस्थितीत कुटुंबाचा गाडा हाकणाऱ्या कोळी कुटुंबाला अर्जुनच्या निधनाने मोठा धक्का बसला आहे.
अर्जुनच्या पश्चात आई, वडील, एक भाऊ आणि दोन बहिणी असा परिवार आहे. कुटुंबातील तरुण मुलाच्या अकाली निधनामुळे कोळी कुटुंबावर दुःखाचा डोंगर कोसळला असून, कंडारी गावात शोक व्यक्त केला जात आहे.
शालेय विद्यार्थ्यांची वाहतूक करताना झालेल्या या अपघाताप्रकरणी संबंधित रिक्षाचालकाविरोधात गुन्हा दाखल करण्याची प्रक्रिया सुरू आहे. पोलिसांकडून या घटनेचा पुढील तपास करण्यात येत आहे. विद्यार्थ्यांच्या वाहतुकीदरम्यान सुरक्षिततेचे नियम पाळण्याचे महत्त्व या दुर्घटनेमुळे पुन्हा अधोरेखित झाले आहे.
