Jalgaon Crime news
जळगाव: जिल्ह्यातील जामनेर तालुक्यात एका ३५ वर्षीय विवाहित महिलेवर वारंवार लैंगिक अत्याचार करून तिच्याकडून एक लाख रुपये उकळल्याचा गंभीर प्रकार उघडकीस आला आहे. याप्रकरणी फत्तेपूर पोलीस ठाण्यात गुन्हा दाखल करण्यात आला असून संशयीत आरोपी अद्याप फरार आहे.
पोलिसांनी दिलेल्या माहितीनुसार, गोरनाळा येथील ३५ वर्षीय महिलेने दिलेल्या फिर्यादीनुसार, एप्रिल २०२६ मध्ये ती स्वतःच्या शेतात टोमॅटो तोडत असताना आरोपी योगेश भरत इंगळे (रा. गोरनाळा, ता. जामनेर) हा तेथे आला. आरोपीने महिलेकडे पैशांची मागणी करत पैसे न दिल्यास तिची गावात बदनामी करण्याची धमकी दिल्याचा आरोप आहे.
फिर्यादीनुसार, महिलेने पैसे देण्यास नकार दिल्यानंतर आरोपीने तिला जबरदस्तीने शेतातील मका पिकात नेऊन तिच्यावर लैंगिक अत्याचार केला. त्यावेळी आरोपीने तिचे फोटो आणि व्हिडिओ काढून ते सार्वजनिक करण्याची धमकी दिली. या भीतीचा फायदा घेत आरोपीने त्यानंतरही तीन वेळा तिच्यावर अत्याचार केल्याचा तसेच व्हिडिओ प्रसारित करण्याची धमकी देत तिच्याकडून सुमारे एक लाख रुपये उकळल्याचा आरोप फिर्यादीने केला आहे.
या प्रकरणी १६ जुलै रोजी रात्री ८.३२ वाजता फत्तेपूर पोलीस ठाण्यात गुन्हा दाखल करण्यात आला आहे. आरोपीविरुद्ध गुन्हा नोंदविण्यात आला आहे. या गुन्ह्याचा तपास पोलीस उपनिरीक्षक राणी केशव जाधव करीत असून, आरोपीला अटक करण्यासाठी पोलिसांकडून शोधमोहीम सुरू आहे.
