जळगाव: जळगाव जिल्ह्यातील सहा नगरपरिषदांच्या निवडणुकीसाठी शनिवार (दि.20) रोजी आज सकाळपासूनच उत्साहात मतदानाला सुरुवात झाली आहे. निवडणूक प्रशासनाकडून प्राप्त झालेल्या आकडेवारीनुसार, दुपारी १:३० वाजेपर्यंत जिल्ह्यात सरासरी २९.७५ टक्के इतके मतदान झाले आहे. यामध्ये यावल नगरपरिषदेत मतदारांचा सर्वाधिक उत्साह दिसून येत असून, तिथे सर्वाधिक ४९.३३ टक्के मतदान झाले आहे.
टप्प्याटप्प्याने वाढला मतदानाचा टक्का
सकाळी ७:३० वाजता मतदानाला सुरुवात झाल्यानंतर पहिल्या दोन तासांत (सकाळी ९:३० पर्यंत) केवळ ४.२६ टक्के मतदान झाले. त्यानंतर ११:३० वाजेपर्यंत हा आकडा १४.५७ टक्के वर पोहोचला आणि दुपारी १:३० वाजेपर्यंत जिल्ह्यात एकूण ३३,६६२ मतदारांपैकी १०,०१४ मतदारांनी आपला हक्क बजावला आहे.
नगरपरिषदनिहाय मतदानाची स्थिती (दुपारी १:३० पर्यंत):
जिल्ह्यातील विविध केंद्रांवर झालेल्या मतदानाची टक्केवारी खालीलप्रमाणे आहे:
यावल: ४९.३३ टक्के (सर्वाधिक उत्साह)
सावदा: ३७.८८ टक्के
पाचोरा: २९.९८ टक्के
अमळनेर: २९.३७ टक्के
वरणगाव: २८.९६ टक्के
भुसावळ: २०.१३ टक्के (सर्वात कमी मतदान)
स्त्री-पुरुष मतदानाची आकडेवारी
दुपारी १:३० पर्यंत एकूण १०,०१४ मतदानाची नोंद झाली आहे. यामध्ये ५,१७९ पुरुष मतदारांनी, तर ४,८३५ महिला मतदारांनी मतदानाचा हक्क बजावला आहे. 'इतर' प्रवर्गातील एकाही मतदानाची नोंद अद्याप झालेली नाही. दुपारनंतर मतदानाचा वेग वाढण्याची शक्यता वर्तवण्यात येत असून, सायंकाळी उशिरापर्यंत अंतिम टक्केवारी स्पष्ट होईल. प्रशासनातर्फे सर्व केंद्रांवर चोख बंदोबस्त ठेवण्यात आला आहे.
