जळगाव : मुक्ताईनगर पोलिसांनी मोठी कारवाई करत महाराष्ट्रात प्रतिबंधित असलेला गुटखा व पानमसाला वाहतूक करणाऱ्यांवर धडक कारवाई केली. या कारवाईत ८ लाख २० हजार ५०० रुपयांचा मुद्देमाल जप्त करण्यात आला असून, आरोपी अद्याप फरार आहे.
पोलीसांनी दिलेल्या माहितीनुसार, १८ जुलै २०२६ रोजी रात्री सुमारे ११.२० वाजता मुक्ताईनगर–बऱ्हाणपूर मार्गावरील आरंभ हॉटेलसमोरील सार्वजनिक रस्त्यावर पोलिसांच्या पथकाने संशयित इनोव्हा क्रमांक एम एच 28 ए के8999 वाहनाची तपासणी केली. वाहनातून महाराष्ट्रात प्रतिबंधित असलेला केसरयुक्त विमल पानमसाला व व्ही-बिग तंबाखू मोठ्या प्रमाणात वाहतूक होत असल्याचे आढळून आले.
या कारवाईत ४ लाख २० हजार रुपयांचा प्रतिबंधित गुटखा, ४ लाख रुपयांचे इनोव्हा वाहन आणि ५०० रुपयांचा लावा कंपनीचा मोबाईल असा एकूण ८ लाख २० हजार ५०० रुपयांचा मुद्देमाल जप्त करण्यात आला.
या प्रकरणी शेख सलीम शेख इस्माईल (वय ५९, रा. गौरकशनवाडी, ता. चिखली, जि. बुलढाणा) याच्याविरुद्ध मुक्ताईनगर पोलीस ठाण्यात गुन्हा क्रमांक २९२/२०२६ दाखल करण्यात आला आहे. त्याच्यावर भारतीय न्याय संहिता, २०२३ मधील कलम १२३, २२३, २७४, २७५, ३(५) तसेच अन्न सुरक्षा व मानके अधिनियम, २००६ मधील संबंधित कलमान्वये गुन्हा नोंदविण्यात आला आहे.
या प्रकरणाची फिर्याद योगराज किशोर सूर्यवंशी (वय २६), अन्न सुरक्षा अधिकारी यांनी दिली असून, पुढील तपास सहाय्यक पोलीस निरीक्षक जयेश पाटील करीत आहेत. पोलिसांनी आरोपीचा शोध सुरू केला असून, तो अद्याप अटकेत आलेला नाही.
