Jalgaon Elderly Woman Robbed
जळगाव : शहरातील आयोध्या नगर परिसरात मॉर्निंग वॉकसाठी गेलेल्या ७५ वर्षीय महिलेच्या गळ्यातील सुमारे दीड लाख रुपये किंमतीचे सोन्याचे मंगळसूत्र दुचाकीवरून आलेल्या दोन चोरट्यांनी हिसकावून नेल्याची घटना रविवारी (दि. १४) सकाळी घडली.
पोलिसांनी दिलेल्या माहितीनुसार, मंगला शांताराम चौधरी (वय ७५, रा. आयोध्या नगर, जळगाव) या रविवारी सकाळी सुमारे ६ वाजता नेहमीप्रमाणे मॉर्निंग वॉकसाठी घराबाहेर पडल्या होत्या. आयोध्या किराणा समोरील गल्लीतून जात असताना दुचाकीवरून आलेल्या दोन युवकांनी त्यांना अडवले. दुचाकी चालवणाऱ्या युवकाने ‘तृप्ती कॉर्नर कुठे आहे?’ अशी विचारणा केली.
चौधरी यांनी रस्ता दाखवण्यासाठी हात केला असता, मागे बसलेल्या युवकाने त्यांच्या गळ्यातील सोन्याचे मनी मंगळसूत्र झडप घालून हिसकावले.घटनेनंतर दोन्ही आरोपी दुचाकीवरून भरधाव वेगाने भुसावळ महामार्गाच्या दिशेने पसार झाले. चोरीस गेलेल्या मंगळसूत्राची किंमत अंदाजे १ लाख ५० हजार रुपये असल्याचे सांगण्यात आले.
या प्रकरणी मंगला चौधरी यांच्या फिर्यादीवरून जळगाव शहर पोलीस ठाण्यात जबरी चोरीचा गुन्हा दाखल करण्यात आला आहे. आरोपींपैकी एकाची ओळख सादिक शेख उर्फ शेख इराणी (वय २३, रा. पापा नगर, रजा टॉवरजवळ, भुसावळ) अशी पटली असून त्याच्या साथीदाराचा शोध सुरू आहे.
या प्रकरणाचा तपास पोलीस उपनिरीक्षक चंद्रकांत धनके करीत असून वृत्त लिहिपर्यंत कोणत्याही आरोपीला अटक करण्यात आलेली नव्हती.
