जळगाव: जळगाव शहरालगत असलेल्या औद्योगिक वसाहतीमध्ये (एमआयडीसी) रविवारी रात्री साडेदहा वाजण्याच्या सुमारास एका कंपनीबाहेर गोळीबार झाल्याची धक्कादायक घटना उघडकीस आली आहे. एमआयडीसी, जी-सेक्टर 12 मधील 'विजेता इलेक्ट्रॉनिक्स' नावाच्या कंपनीजवळ हा प्रकार घडला, ज्यामुळे परिसरात मोठी खळबळ उडाली आहे. या गोळीबारात दोन कामगार जखमी झाले असून, त्यापैकी एकाची प्रकृती चिंताजनक असल्याने त्यांच्यावर जिल्हा रुग्णालयात उपचार सुरू आहेत.
सूत्रांकडून मिळालेल्या माहितीनुसार, सरफू शेख नावाचा कामगार कामावर जात असताना कंपनीजवळील एका टपरीवर सुरू असलेल्या अवैध दारू अड्ड्यावर चालकाला मारहाण होताना त्याने पाहिले. दारू विक्रेत्याने सरफू शेख यालाही मारहाण करण्यास सुरुवात केली.
मारहाण झाल्यानंतर सरफू शेख याने मदतीसाठी कंपनीत काम करणारे त्याचे दोघे भाऊ, राजन शेख आणि अहमद फिरोज शेख यांना बोलावले. दोन्ही भाऊ कंपनीच्या बाहेर येताच दारू विक्रेत्याने त्यांना शिवीगाळ केली आणि तेथे उपस्थित असलेल्या एका महिलेने त्याला गावठी पिस्तूल दिले.
पिस्तूल हातात येताच दारू विक्रेत्याने कामगारांच्या दिशेने चार ते पाच राऊंड फायर केले. या गोळीबारात राजन शेख रफीउल्ला आणि अहमद फिरोज शेख हे दोघे गंभीर जखमी झाले आहेत.
घटनेनंतर पोलिसांनी घटनास्थळाची पाहणी केली असता, दोन रिकाम्या पुंगळ्या (फायर झालेले राऊंड) आणि दोन जिवंत काडतुसे मिळाली आहेत. आरोपींनी यापेक्षा जास्त फायर केल्याची शक्यताही नाकारता येत नाही, असे पोलिसांनी सांगितले.
या घटनेमुळे एमआयडीसी परिसरात रात्रीच्या वेळी अवैध दारू व्यवसाय खुलेआम सुरू असल्याचे उघड झाले आहे. पोलीस यंत्रणेच्या नाकावर टिच्चून किंवा त्यांना गुंगारा देऊन हा अवैध व्यवसाय सुरू असल्याने रात्रीच्या पोलीस गस्तीवर गंभीर प्रश्नचिन्ह निर्माण झाले आहे.
या प्रकरणी एमआयडीसी पोलीस ठाण्यात गुन्हा नोंद करण्यात आला आहे. आरोपी राहुल बऱ्हाटे आणि त्याची साथीदार मोनाली राहुल बऱ्हाटे या दोघांचा पोलीस कसून शोध घेत असून, आरोपींना पकडण्यासाठी पथके रवाना करण्यात आल्याची माहिती अधिकाऱ्यांनी दिली आहे.
