Land Survey Officer Arrested
जळगाव : जिल्हा अधीक्षक, भूमी अभिलेख कार्यालयात कार्यरत असलेले भूमापन अधिकारी जितेंद्र प्रकाश पाटील (वय ४५) यांना प्रलंबित काम करून देण्याच्या मोबदल्यात १५ हजार रुपयांची लाच स्वीकारताना लाचलुचपत प्रतिबंधक विभागाने (एसीबी) रंगेहात अटक केली. या प्रकरणी जिल्हापेठ पोलीस ठाण्यात भ्रष्टाचार प्रतिबंध अधिनियम, १९८८ च्या कलम ७ अंतर्गत गुन्हा दाखल करण्यात आला आहे.
तक्रारदारांच्या वडिलोपार्जित घराच्या नोंदीत झालेल्या फेरफाराविरोधात त्यांनी भूमी अभिलेख विभागाकडे अपील दाखल केले होते. संबंधित अपील मंजूर झाल्यानंतर नोंद दुरुस्त करण्याचे आदेशही देण्यात आले. मात्र, ७/१२ उताऱ्यावर आवश्यक नोंद अद्ययावत करण्याची प्रक्रिया दीर्घकाळ प्रलंबित होती.
याबाबत तक्रारदारांनी संबंधित कार्यालयात विचारणा केली असता, आरोपी जितेंद्र पाटील यांनी वरिष्ठ अधिकाऱ्यांसाठी १० हजार रुपये आणि स्वतःसाठी ५ हजार रुपये, अशी एकूण १५ हजार रुपयांच्या लाचेची मागणी केल्याचा आरोप आहे. त्यानंतर तक्रारदारांनी २५ जून २०२६ रोजी एसीबीकडे तक्रार दाखल केली.
तक्रारीची पडताळणी करून लाच मागणीची खातरजमा झाल्यानंतर एसीबीने सापळा रचला. नियोजित कारवाईदरम्यान जितेंद्र पाटील यांनी तक्रारदारांकडून १५ हजार रुपयांची रक्कम स्वीकारताच एसीबीच्या पथकाने त्यांना रंगेहात ताब्यात घेतले.
या कारवाईचे पर्यवेक्षण पोलीस उपअधीक्षक योगेश ठाकूर यांनी केले. सापळा अधिकारी म्हणून पोलीस निरीक्षक रेश्मा अवतारे यांनी कामकाज पाहिले असून, या प्रकरणाचा पुढील तपासही पोलीस उपअधीक्षक योगेश ठाकूर करीत आहेत.
