Jalgaon Firing Incident
जळगाव : शहरातील गणेशनगर परिसरात जुन्या वादातून एका तरुणावर गावठी कट्ट्यातून गोळी झाडल्याची घटना सोमवारी (दि. १२) रात्री साडेदहाच्या सुमारास घडली. रिदम हॉस्पिटलबाहेर घडलेल्या या घटनेत अर्जुन रोहिदास राठोड हा तरुण जखमी झाला असून, त्याच्यावर शासकीय वैद्यकीय महाविद्यालय व रुग्णालयात उपचार सुरू आहेत. या प्रकरणी जिल्हापेठ पोलिसांनी तिघांविरुद्ध खुनाचा प्रयत्न आणि भारतीय हत्यार कायद्यान्वये गुन्हा दाखल केला आहे. यश आंभोरे उर्फ सी.के. याला अटक करण्यात आली असून, गोळीबार करणारा मुख्य आरोपी हितेश गायकवाड उर्फ सामान आणि त्याचा अन्य एक साथीदार फरार आहेत.
पोलिसांकडून मिळालेल्या माहितीनुसार, फिर्यादी किशोर रोहिदास राठोड (वय २९) यांचा लहान भाऊ अर्जुन राठोड हा १२ ऑक्टोबर रोजी रात्री साडेदहाच्या सुमारास गणेशनगरमधील रिदम हॉस्पिटलबाहेर उभा होता. दोन दिवसांपूर्वी झालेल्या वादाचा राग मनात धरून हितेश गायकवाड उर्फ सामान, यश आंभोरे उर्फ सी.के. आणि त्यांचा एक अनोळखी साथीदार हे तिघे मोटारसायकलवरून घटनास्थळी आले. त्यांनी अर्जुनला गाठून शिवीगाळ केली आणि जुन्या वादावरून पुन्हा वाद सुरू केला.
अर्जुन आपली ॲक्टिव्हा मोपेड बाजूला घेण्याचा प्रयत्न करत असताना, यश आंभोरे आणि त्याच्या साथीदाराने हितेश गायकवाड याला अर्जुनवर हल्ला करण्यासाठी चिथावणी दिल्याचा आरोप आहे. त्यानंतर हितेशने कमरेतून गावठी कट्टा काढून अर्जुनच्या दिशेने गोळी झाडली. ही गोळी अर्जुनच्या उजव्या कानामागील भागाला लागून गेल्याने तो जखमी होऊन खाली कोसळला.
गोळीबाराच्या आवाजाने परिसरात घबराट पसरली. या गोंधळात तिन्ही आरोपी घटनास्थळावरून पसार झाले. जखमी अर्जुनला तातडीने जळगाव येथील शासकीय वैद्यकीय महाविद्यालय व रुग्णालयात दाखल करण्यात आले. तेथे त्याच्यावर उपचार सुरू आहेत.
घटनेची माहिती मिळताच जिल्हापेठ पोलिसांनी घटनास्थळी धाव घेत तपास सुरू केला. किशोर राठोड यांच्या फिर्यादीवरून जिल्हापेठ पोलीस ठाण्यात गुन्हा रजिस्टर क्रमांक ३३४/२०२६ नुसार भारतीय न्याय संहिता (बीएनएस) कलम १०९(१), ३(५) तसेच भारतीय हत्यार कायद्याच्या कलम ३ आणि २५ अन्वये गुन्हा नोंदवण्यात आला आहे.
पोलिसांनी कारवाई करत यश आंभोरे उर्फ सी.के. याला अटक केली आहे. गोळीबार करणारा मुख्य आरोपी हितेश गायकवाड उर्फ सामान आणि त्याचा अनोळखी साथीदार अद्याप फरार असून, त्यांचा शोध घेण्यासाठी पोलिसांची पथके रवाना करण्यात आली आहेत.
गजबजलेल्या नागरी वस्तीत गोळीबाराची घटना घडल्याने शहरातील कायदा व सुव्यवस्थेबाबत पुन्हा प्रश्न उपस्थित झाले आहेत. गावठी कट्ट्यांसारखी शस्त्रे गुन्हेगारांपर्यंत कशी पोहोचतात आणि अशा घटनांना आळा घालण्यासाठी कोणती उपाययोजना केली जाणार, याबाबत नागरिकांमध्ये चिंता व्यक्त होत आहे. या प्रकरणाचा पुढील तपास जिल्हापेठ पोलीस करत आहेत.
