पुढारी ऑनलाइन डेस्क | धरणगाव-चोपडा रोडवर पिंपळे फाट्याजवळ आज पहाटे एसटी बसचा भीषण अपघात झाला. या अपघातात एक जण ठार झाल्याची माहिती समोर येत आहे. तर 21 प्रवासी जखमी झाले आहेत. या अपघातातील जखमी बस ड्रायव्हर गंभीर जखमी असल्याची माहिती वैद्यकीय सूत्रांनी दिली आहे.
धरणगाव तालुक्यातील दोनगाव येथे बस अनियंत्रित होऊन इलेक्ट्रिक पोलला धडकल्यानंतर 28 प्रवासी जखमी झाल्याची घटना शुक्रवारी पहाटे घडली होती. त्यानंतर आज पहाटे सहा वाजेच्या सुमारास धरणगाव चोपडा रोडवरील पिंपळे फाट्याजवळ उभे असलेल्या एका ट्रॅक्टरला बसने मागून धडक दिली. ही धडक एवढी भीषण होती की एसटी बस ड्रायव्हरची केबिन पूर्णपणे चक्काचूर झाली होती.
या अपघातात एक जण ठार तर 21 प्रवासी जखमी झाल्याची प्राथमिक माहिती समोर आली आहे. या अपघातात एसटीचा ड्रायव्हर गंभीर जखमी असल्याची माहिती समोर येत आहे. घटनास्थळी पोलीस निरीक्षक पवन देसले आपल्या कर्मचाऱ्यांसह पोहोचले होते त्यांनी वाहतूक सुरळीत केली. सर्व जखमींवर धरणगाव ग्रामीण रुग्णालयात उपचार सुरू आहेत.
या बस अपघातात जाकीर शब्बीर खाटीक (वय -३५, रा. पिंप्री), शब्बीर रहे मुल्ला खाटीक (वय-६५, पिंप्री), गंगाराम आनंदा बाविस्कर (वय -६८, पिंप्राळा), प्रमिला ईश्वर सोनवणे (वय-५०, जळगाव), अनिश हनीफ शेख (वय-३८, चोपडा), सागर विठ्ठल पाटील (वय -२८, रोटवद), भगवान सुपडू पाटील (वय-७५, रा. पिंपळे सिम), जयश्री गणेश मराठे वय-४५, शरद बिलाडिया पारधी (वय-४०, नंदुरबार), विमल रमेश मराठे (वय-६५, नळयात), रमेश सोनू मराठी वय-७५, कमलबाई काशिनाथ मराठे (वय-७५), वरुड प्रवीण भगवान कुंभार (वय-२४, गोरगाव), ज्योती योगेश पाटील (वय-३८, साळवा), सुषमा कपिल सिंग बयास (वय -३६, धरणगाव), मेघना कपिलसिंग बयास (वय -७, धरणगाव), योगेश दिगंबर पाटील (वय-३६, धरणगाव), सुनील रामसिंग अलकारी (वय -५८, जळगाव), अनिता सुनील अलकारी (वय-५२, जळगाव), नंदा वसंत बाविस्कर (वय-३३, साळवा) आणि व्ही.व्ही. इंगोले (वय-४०, जळगाव) २१ प्रवासी गंभीररित्या जखमी झाले आहेत. यातील बसचालकाची प्रकृती चिंताजनक असल्याची माहिती वैद्यकीय अधिकारी यांनी दिली आहे.
