Jalgaon Container Overturns
जळगाव : गुजरातमधून नागपूरकडे जाणारा रसायनाने भरलेला कंटेनर राष्ट्रीय महामार्गावर चालकाचे नियंत्रण सुटल्याने पलटी झाला. या अपघातात कंटेनरमधील ऑर्थो-नायट्रोटोल्युईन (Ortho-Nitrotoluene) या ज्वलनशील व विषारी रसायनाची गळती झाल्याने परिसरात सतर्कतेचा इशारा देण्यात आला आहे.
अपघाताची माहिती मिळताच अग्निशमन दल, पोलीस, रुग्णवाहिका आणि क्रेन घटनास्थळी दाखल झाले. गळती रोखण्यासाठी आणि परिस्थिती नियंत्रणात आणण्यासाठी संबंधित यंत्रणांनी तातडीने उपाययोजना सुरू केल्या असून, परिसरात पोलिसांचा बंदोबस्त तैनात करण्यात आला आहे.
अपघातग्रस्त कंटेनर (क्र. GJ-06-BT-8845) हा महामार्गाच्या खाली उतरल्यामुळे राष्ट्रीय महामार्गावरील वाहतूक सुरळीत सुरू असून, वाहतूक वळविण्याची गरज भासलेली नाही.
ऑर्थो-नायट्रोटोल्युईन हे ज्वलनशील आणि विषारी औद्योगिक रसायन असून त्याचा वापर प्रामुख्याने रंगद्रव्ये (डाई), रबर उद्योगातील रसायने, कृषी रसायने तसेच औषधनिर्मितीसाठी कच्चा माल म्हणून केला जातो.
या रसायनाच्या संपर्कात आल्यास त्वचा, डोळे आणि श्वसनसंस्थेवर दुष्परिणाम होऊ शकतात. त्यामुळे गळती झालेल्या परिसरापासून सुरक्षित अंतर राखण्याचे आवाहन प्रशासनाने नागरिकांना केले आहे.
सध्या संबंधित यंत्रणांकडून रसायनाची गळती पूर्णपणे रोखण्याचे आणि परिस्थिती नियंत्रणात आणण्याचे काम युद्धपातळीवर सुरू आहे. या घटनेत अद्याप कोणतीही जीवितहानी झाल्याची माहिती समोर आलेली नाही.
