Cannabis Seized Chalisgaon Jalgaon
जळगाव : चाळीसगाव शहरातील चामुंडा माता मंदिराजवळ डोंगरी नदीच्या काठावरील एका घरात बेकायदेशीररीत्या गांजाचा साठा करून त्याची विक्री करणाऱ्या संशयिताचा चाळीसगाव शहर पोलिसांनी पर्दाफाश केला. या कारवाईत पोलिसांनी तब्बल ९ लाख ३४ हजार ३०० रुपये किमतीचा १८ किलो ६८६ ग्रॅम गांजा जप्त केला असून, संशयित भूषण केशव पवार (वय ४५) याला अटक केली आहे.
पोलिसांना २५ ऑगस्ट रोजी रात्री सुमारे १०.१० वाजता भूषण पवार हा आपल्या राहत्या घरात विक्रीच्या उद्देशाने गांजाचा साठा करून ठेवत असल्याची माहिती मिळाली. माहितीच्या आधारे पोलिस पथकाने तातडीने संबंधित घरावर छापा टाकला.
घराची झडती घेतली असता प्लास्टिकच्या पिशवीत २ लाख ७० हजार ५० रुपये किमतीचा ५ किलो ४०१ ग्रॅम गांजा, तर पांढऱ्या गोणीत ६ लाख ६४ हजार २५० रुपये किमतीचा १३ किलो २८५ ग्रॅम गांजा आढळून आला. दोन्ही ठिकाणचा मुद्देमाल मिळून एकूण १८ किलो ६८६ ग्रॅम गांजा, असा ९ लाख ३४ हजार ३०० रुपयांचा मुद्देमाल पोलिसांनी जप्त केला.
या प्रकरणी चाळीसगाव शहर पोलीस ठाण्याचे पोलीस शिपाई दिलीप शिवाजी राक्षे यांच्या फिर्यादीवरून २६ ऑगस्ट रोजी गुन्हा दाखल करण्यात आला. पोलिसांनी भूषण केशव पवार याला २६ ऑगस्ट रोजी पहाटे अटक केली. या कारवाईमुळे चाळीसगाव शहर व परिसरात खळबळ उडाली आहे.
या प्रकरणाचा पुढील तपास चाळीसगाव शहर पोलीस ठाण्याचे पोलीस उपनिरीक्षक संदीप घुले करीत आहेत. जप्त केलेला गांजा नेमका कुठून आणण्यात आला होता आणि तो कोणाला विकला जाणार होता, याचा तपास पोलिसांकडून सुरू आहे.
