धुळे : दि शिरपूर मर्चेंट को-ऑप. बँकेच्या अपहार व आर्थिक फसवणुकीच्या गुन्ह्यातील संचालक किरण दलाल यांना आर्थिक गुन्हे शाखेने अटक केली आहे. दि. शिरपूर मर्चेंट बँकेचे अधिकारी, कर्मचारी, चेअरमन व कर्जदार असे एकुण ४६ इसमांनी संगनमत करुन बँकेचा व बँकेमधील सभासद व गुंतवणूकदार अशांच्या एकुण १३ कोटी ७५ लाख ८६ हजार २५३ रुपयांचा अपहार व आर्थिक फसवणुक केली आहे. म्हणुन लेखापरीक्षक यांनी अपहार प्रकरणी शिरपूर शहर पोलीस स्टेशन येथे भा.दं.वि. कलम ४०३,४०९, ४२०, १२० (ब) सह वाढीव महाराष्ट्र ठेवीदारांच्या (वित्तीय संस्थांमधील) हितसंबंधाचे संरक्षण अधिनियम १९९९ चे कलम ३ प्रमाणे गुन्हा दाखल केला आहे.
या गुन्ह्याचा तपास आर्थिक गुन्हे शाखा यांच्याकडून सुरु आहे. यागुन्ह्याच्या तपासा दरम्यान अधिक पुराव्यांवरुन बँकेचे तत्कालीन संचालक मंडळामधील संचालक काशीनाथ सोमा महाजन, राजेंद्र शिवप्रसाद पंडीत, तुषार विश्वासराव रंधे, मनोज ओमप्रकाश अग्रवाल, नवनित गिरधारीलाल राखेचा, महेश जयराम लोहार, साहेबराव भिका महाजन, केवलसिंग बाबुराव राजपुत, मुकेश ताराचंद अग्रवाल, किरण यशवंत दलाल, रामचंद्र उखा ठाकरे, विनोद शांतीलाल चावडा, सौ. पुनम राजेश भंडारी, श्रीमती. स्मिता वनीतलाल कोठारी यांची नावे आरोपी म्हणून निष्पन्न करुन गुन्ह्यात वाढविण्यात आलेली आहेत.
त्या अनुषंगाने गुन्ह्याचा तपास सुरु असताना गुन्ह्यातील आरोपी किरण यशवंत दलाल हा मिळुन आल्याने त्यास ताब्यात घेवुन गुन्हयाबाबत विचारपुस करता त्याने गुन्हा केल्याची कबुली दिली. तसेच त्याचा गुन्हयात सहभाग दिसत असल्याने या आरोपीस अटक करुन न्यायालया समोर हजर केले असता चार दिवसांची पोलीस कस्टडी दिली आहे. ही कामगिरी पोलीस अधीक्षक विशाल आनंद, अपर पोलीस अधीक्षक अजय देवरे, उपविभागीय पोलीस अधिकारी विश्वजीत जाधव यांच्या मार्गदर्शनाखाली पोउनि अमोल देवढे, पोउनि सविता गवांदे, पोलीस अंमलदार रविंद्र माळी, गणेश खैरनार, प्रभाकर बैसाणे, श्रीकांत पाटील, विलास पाटील यांनी केली आहे.
