धुळे : धुळे शहरातील मोहाडी परिसरात पोलीस आणि एका गुन्हेगारामध्ये तब्बल तासभर थरारनाट्य रंगले. कारवाईसाठी गेलेल्या पोलिसांना पाहताच राजवीरसिंग मिलनसिंग भादा हा हातात तलवार घेऊन घराबाहेर आला. त्यानंतर थेट घराच्या छतावर चढून त्याने तलवार फिरवत पोलिसांना आव्हान दिले. या प्रकारामुळे परिसरात एकच खळबळ उडाली. अखेर मोठ्या पोलीस बंदोबस्ताच्या मदतीने पोलिसांनी शिताफीने त्याला ताब्यात घेतले. या संपूर्ण घटनेचा व्हिडिओही समोर आला आहे.
मिळालेल्या माहितीनुसार, धुळे तालुका पोलिसांचे पथक मोहाडी परिसरात कारवाईसाठी गेले होते. यावेळी पोलिसांना पाहताच राजवीरसिंग भादा हातात तलवार घेऊन घराबाहेर आला. त्यानंतर तो घराच्या छतावर चढला आणि तलवार फिरवत पोलिसांना रोखण्याचा प्रयत्न करू लागला. अचानक घडलेल्या या प्रकारामुळे पोलिसांसमोर मोठे आव्हान निर्माण झाले.
आरोपीच्या हातात तलवार असल्याने परिस्थिती अत्यंत संवेदनशील बनली होती. तब्बल तासभर हा थरार सुरू होता. आरोपीच्या आक्रमक पवित्र्यामुळे मोहाडी परिसरात तणावाचे वातावरण निर्माण झाले. परिस्थिती नियंत्रणात आणण्यासाठी पोलिसांनी अतिरिक्त कुमक मागवली. काही वेळातच मोठा पोलीस फौजफाटा घटनास्थळी दाखल झाला.
दरम्यान, पोलिसांची मोठी कुमक पाहून आरोपीने स्वतःवरच तलवारीने वार केले. मात्र, जखमी अवस्थेतही त्याने तलवार फिरवण्याचा प्रयत्न सुरूच ठेवला. त्यामुळे पोलिसांसमोरील आव्हान अधिकच वाढले.
अत्यंत सावधगिरीने परिस्थिती हाताळत धुळे तालुका पोलिसांनी अखेर आरोपीला ताब्यात घेण्यात यश मिळवले. पोलीस निरीक्षक हेमंतकुमार भामरे यांच्या नेतृत्वाखालील पथकाने ही कारवाई केली. या घटनेत राजवीरसिंग भादा जखमी झाला असून, त्याला पोलिसांनी ताब्यात घेतले आहे.