राहुरी: तालुक्यातील डिग्रस येथील जुगार अड्ड्यावर राहुरी पोलिसांनी छापा टाकून, सुमारे १ लाख १५ हजार रुपयांचा मुद्देमाल जप्त केला. या कारवाईत चार जणांना ताब्यात घेवून, त्यांच्याविरुद्ध गुन्हा दाखल करण्यात आला आहे.
डिग्रस येथील एका पत्र्याच्या शेडमध्ये रम्मी नावाचा हार-जित जुगार सुरू असल्याची गुप्त माहिती पोलिस निरीक्षक रविंद्र देशमुख यांना मिळाली. त्यांच्या आदेशानुसार पोलिस हवालदार सूरज गायकवाड, राहुल यादव, देविदास कोकाटे, प्रमोद ढाकणे, सचिन ताजणे, सतीश कुऱ्हाडे व चालक संदीप रोकडे आदींच्या पथकाने दुपारी साडेचार वाजेच्या सुमारास घटनास्थळी छापा टाकला.
छाप्यादरम्यान काही जुगारी रम्मीचा जुगार खेळत असल्याचे आढळले. पोलिसांनी त्यांना जागेवर ताब्यात घेतले. १२ हजार ४५० रुपये रोकड व जुगारासाठी वापरलेले साहित्य आदी इतर वस्तूंसह एकूण १ लाख १५ हजार रुपयांचा मुद्देमाल पोलिसांनी जप्त केला.
याप्रकरणी पोलिस नाईक नदिम शेख यांच्या फिर्यादीवरून दिलीप यमनाथ पवार, किशोर रमेश भोसले, विशाल अशोक काळे व प्रकाश रामभाऊ ठोकळ (सर्व रा. डिग्रस, ता. राहुरी) यांच्याविरुद्ध जुगार प्रतिबंधक कायद्यान्वये गुन्हा दाखल करण्यात आला आहे. पुढील तपास राहुरी पोलिस करीत आहेत.
