नेवासा: महसूल विभागाच्या पथकाने तालुक्यातील चांदा -लोहारवाडी शिवारात होत असलेल्या अवैध गौण खनिज उत्खननाविरोधात शनिवारी पहाटे धडक कारवाई करीत एक जेसीबी सह एक डंपर ताब्यात घेतले. महसूल पथकाच्या कारवाईची चाहूल लागताच इतर ट्रॅक्टर व डंपरने मुरूमासह स्पॉटवरून पोबारा केला. दरम्यान, चांदा व परिसरात कोट्यवधी रुपयांचा हजारो ब्रास मुरुमाचे उत्खनन झाल्याचे आढळून आले.
तालुक्यातील चांदा शिवारात सर्रास होत असलेल्या अवैध मुरूम तस्करी बाबतचे फोटो, व्हिडिओ नेवाशाचे उपविभागीय अधिकारी सुधीर पाटील यांना गुप्त माहितीदाराकडून मिळाली. त्याची गांभीर्याने दखल घेत पाटील यांनी तहसीलदार डॉ. संजय बिरादार यांना कारवाईचे आदेश दिले. तहसीलदारांच्या पथकाने संबंधित ठिकाणी छापा टाकून अवैध मुरूम उत्खनन करणारे एक जेसीबीसह एक डंपर ताब्यात घेतले.
जिल्हाधिकारी पंकज आशिया, अतिरिक्त जिल्हाधिकारी शैलेश हिंगे व उपविभागीय अधिकारी सुधीर पाटील यांच्या मार्गदर्शनाखाली तहसीलदार डॉ. संजय बिरादार यांच्या नेतृत्वाखाली नायब तहसीलदार चांगदेव बोरुडे, सोनई मंडलाधिकारी प्रशांत कांबळे, वडाळा मंडलाधिकारी फिरोज सय्यद, नेवासा मंडलाधिकारी अनिल गव्हाणे, तलाठी गडकर, भावसार, कोतवाल योगेश मिसाळ, अमोल शिंदे, संदीप शिरसाठ, संतोष महाडिक यांच्या पथकाने ही कारवाई केली.
स्थानिक महसूल यंत्रणा करते काय?
जिल्हाधिकारी, उपविभागीय अधिकाऱ्यांना अवैध गौणखानिज तस्करीचे व्हिडिओ-फोटो जातात. त्यानंतर कारवाई होते. मात्र, चांदा येथील स्थानिक महसूल यंत्रणा काय करते. त्यांनी या मुरूम तस्करीचे का कारवाई केली नाही. या बरोबरच जिल्हाधिकारी, उपविभागीय अधिकारी व तहसीलदार या प्रकरणी त्यांच्यावर काय कारवाई करणार? असे अनेक प्रश्नही नागरिकांकडून उपस्थित होत आहेत.
संबंधित कारवाईत एक जेसीबी व डंपर ताब्यात घेतले असून, त्यांच्यावर दंडात्मक कारवाई करण्यात येईल. तसेच संबंधित मंडळाधिकारी व तलाठ्यांना कारणे दाखवा नोटीस बजावण्यात येणार आहे. त्यांनतर पुढील कारवाई करण्यात येईल.
डॉ. संजय बिरादार, तहसीलदार, नेवासा
