नगर: जिल्ह्यातील नऊ धरणांत ३४ हजार ४६१ दलघफू (६७ टक्के) पाणीसाठा शिल्‍लक आहे. आगामी आठ महिन्‍यांतील दुष्‍काळी परिस्‍थितीत पिण्‍याचे पाणी आणि रब्‍बी पिके तसेच चारा पिकांसाठी या पाण्याचे नियोजन करण्‍यात आले.एप्रिल-मे महिन्‍यांत पाण्याचे स्‍त्रोत कोरडेठाक झाल्‍यास टँकर भरण्‍यासाठी धरणांतील पाण्‍याचा वापर होण्‍याची शक्यता बळावली आहे.
सध्‍या भंडारदरा धरण सोडले तर मुळा, निळवंडे धरणांचा पाणीसाठी सरासरी ६५ टक्के इतकाच शिल्‍लक आहे. दरम्‍यान, मुळा व भंडारदरा धरणांतून प्रवरा व मुळा नदीपात्रांतील कोल्‍हापुरी बंधारे भरले गेले आहेत.
त्‍यामुळे या दोन्‍ही नदीकाठच्‍या जनतेला दोन महिने तरी दिलासा मिळाला आहे. यंदा धरणांच्‍या पाणलोट क्षेत्रात दमदार पाऊस झाल्‍याने भंडारदरा, निळवंडे आढळा शंभर टक्के भरली गेली. मुळा धरणही ९५ टक्के भरलेगेले होते.
मात्र, लाभक्षेत्रात पावसाने ओढ दिल्‍यामुळे या धरणांतील काही टीएमसी पाण्‍याचा वापर खरीप पिके वाचविण्‍यासाठी करण्‍यात आला. त्‍यामुळे मुळा व निळवंडे धरणांचा पाणीसाठा ६५ टक्‍क्‍यांवर आला आहे.
५ नोव्‍हेंबरच्‍या अहवालानुसार घाटशीळ धरण कोरडेठाक असून, सीना धरण २७ टक्के, मांडओहळ १६, खैरी धरण १२ टक्के तर विसापूर धरणात ६४ टक्के पाणीसाठा शिल्‍लक आहे. पावसाअभावी भूजलपातळी तीन मीटरने खालावली आहे. त्‍यामुळे विहिरींनी तळ गाठला. त्‍यामुळे पाणीटंचाईग्रस्‍त गावांची संख्‍या दिवसागणिक वाढू लागली आहे.