अकोले: तालुक्यातील पिंपळदरावाडी येथील साठवण तलाव कामाचे खोदकाम वर्षापासून सुरू होते. खोदकामात निघालेले दगड, मुरूम ही सर्व गौणखनिज नियमाप्रमाणे साठा करणे बंधनकारक होते. परंतु संबंधित ठेकेदाराने गौणखनिज उत्खनन केल्यानंतर त्याची परस्पर विक्री केल्याचा आरोप माजी जिल्हा परिषद सदस्य बाजीराव दराडे यांनी केला आहे.
त्यांच्या तक्रारीनंतर महसूल राज्य मंत्री योगेश कदम यांनी जिल्हाधिकाऱ्यांना चौकशी करुन अहवाल सादर करण्याचे आदेश दिले आहे. याबाबत दराडे म्हणाले, जलसंधारण विभागाच्या निविदेनुसार हे काम ठेकेदाराला मिळाले होते. संबंधित ठेकेदाराने नियमाप्रमाणे जलसंधारण विभागाच्या परवानगीने केल्या जाणाऱ्या खोदकामाची माहिती महसूल विभागाला कळविणे अपेक्षित होते.
सदरचा गौणखनिज साठवण्यासाठी किंवा महसूल विभागाच्या आदेशाने पुढील कार्यवाही होणे अपेक्षित होते, परंतु तसे झालेले नाही. गौणखनिज हे परस्पर कुठल्याही परवानग्या न घेता विक्री करण्यात आले आहे. हा प्रकार अत्यंत गंभीर आहे. महसूल विभागाचे दीड ते अडीच कोटी रुपयांपर्यंतचा बाजारभावाप्रमाणे शासकीय मूल्य व स्वामित्व धन याची एकूण किंमत व नियमाचे उल्लंघन केल्याप्रकरणी सखोल चौकशीची मागणी शासनाकडे केली होती.
याबाबतचे निवेदन प्राप्त झाल्यानंतर राज्याचे गृह, महसूल राज्यमंत्री योगेश कदम यांना बाजीराव दराडे यांनी दिले आहे. त्यावर मंत्र्यांनी जिल्हाधिकाऱ्यांना या प्रकरणाची तातडीने चौकशी करून तसा अहवाल सादर करण्याच्या सूचना दिल्या आहेत.
तहसीलदारांनी मागावला गौण खनिज उत्खननाचा मोजणी अहवाल
बाजीराव दराडे यांनी राज्यमंत्री (महसुल) यांचेकडे दि,9 फेब्रुवारी रोजी केलेला अर्जात नमुद केलेल्या तक्रारीचे अनुषंगाने मंडलाधिकारी खिरविरे यांनी पंचनामा रिपोर्ट सादर केला आहे. पिंपळदरावाडी हद्दीमध्ये साठवण तलावाचे खोदकाम चालू आहे. अंदाजे 60 ते 65 फुट खोली व अंदाजे 180 ते 200 फूट रुंद खोदकाम केलेले दिसून येते. तरी गौण खनिज उत्खनन केलेल्या ठिकाणची मोजणी करुन मोजणी अहवाल तत्काळ इकडे सादर करावा. मंत्री संदर्भ असल्याने प्राधान्य द्यावे, असे पत्र उप अधिक्षक भुमिअभिलेख विभागाला तहसीलदार सिध्दार्थ मोरे यांनी दिले आहे.
