नगर: गणपती आणण्यासाठी गेलेल्या तरुणांवर कार अंगावर घालून गावठी पिस्तुलातून फायरिंग करीत जीवे मारण्याचा प्रयत्न करणाऱ्या एका आरोपीच्या स्थानिक गुन्हे शाखेने अवघ्या २४ तासांत मुसक्या आवळल्या. ओम दीपक भोंडे (वय २१, रा. अण्णापूर, हल्ली रा. बाबुरावनगर, शिरूर, जि. पुणे) असे ताब्यात घेतलेल्या आरोपीचे नाव आहे.
१४ सप्टेंबर २०२६ रोजी फिर्यादी प्रशांत संदीप वाबळे (वय २१, रा. म्हसे, ता. पारनेर) हे मित्रासह शिरूर येथून गणपती घेऊन घरी येत असताना गव्हाणवाडी ते शिरूर जाणारे घोडनदीवरील पुलाजवळ थांबले होते. त्यावेळी आरोपींनी त्यांच्याकडील कार फिर्यादी व त्यांच्या मित्राच्या अंगावर घालून, किशोर शिंदे याने गावठी पिस्तुलातून वाबळे यांच्यावर फायरिंग करून जीवे मारण्याचा प्रयत्न केला. याप्रकरणी बेलवंडी पोलिस ठाण्यात गुन्हा दाखल करण्यात आला होता.
घटनेचे गांभीर्य ओळखून पोलिस अधीक्षक मुम्मका सुदर्शन यांनी स्थानिक गुन्हे शाखेला समांतर तपासाचे आदेश दिले. एलसीबीचे पोलिस निरीक्षक संतोष मुटकुळे यांच्या मार्गदर्शनाखाली उपनिरीक्षक अनंत सालगुडे व कर्मचाऱ्यांची दोन पथके आरोपीच्या शोधाकामी रवाना केली होती.
तांत्रिक विश्लेषण व गोपनीय माहितीच्या आधारे १५ सप्टेंबर रोजी आरोपी ओम भोंडे हा बाबुरावनगर, शिरूर येथे लपून बसल्याची माहिती मिळाली. पथकाने तात्काळ शिरूर येथे सापळा रचून आरोपीला ताब्यात घेतले. पुढील तपासासाठी आरोपीला बेलवंडी पोलिसांच्या ताब्यात देण्यात आले आहे.
