नगर: शहरातील मार्केटयार्ड चौक येथील महामानव भारतरत्न डॉ. बाबासाहेब आंबेडकर यांच्या पूर्णाकृती पुतळ्याचे अनावरण रविवारी (दि.27) उपमुख्यमंत्री अजित पवार आणि विधान परिषदेचे सभापती राम शिंदे यांच्या हस्ते होणार असल्याची माहिती आयुक्त तथा प्रशासक यशवंत डांगे यांनी दिली. क्रांतिसूर्य महात्मा जोतीराव फुले, क्रांतीज्योती सावित्रीबाई फुले यांच्या पूर्णाकृती पुतळ्यासाठी चबुतरा उभारणे, परिसराचे सुशोभीकरणाचे भूमिपूजन यावेळी केले जाणार आहे. (Latest Ahilyanagar News)
आमदार तथा स्वागताध्यक्ष संग्राम जगताप, जलसंपदामंत्री राधाकृष्ण विखे पाटील, खा.नीलेश लंके, आ. किशोर दराडे, आ.सत्यजीत तांबे, आ. शिवाजीराव गर्जे, माजी खासदार डॉ. सुजय विखे पाटील, जिल्हाधिकारी डॉ. पंकज आशिया, जिल्हा परिषदेचे मुख्य कार्यकारी अधिकारी आनंद भंडारी, पोलिस अधीक्षक सोमनाथ घार्गे आणि अनुसूचित जाती-जमाती आयोगाचे सचिव गोरक्ष लोखंडे, महाथेरो जगप्रसिद्ध भंते, विपश्यनाचार्य डॉ. राहुल बोधी, सुप्रसिद्ध गायक आनंद शिंदे उपस्थित राहणार आहेत. कार्यक्रमस्थळी होणारी गर्दी लक्षात घेता मार्केटयार्ड येथील वाहतूक अन्य मार्गाने वळवण्यात आली आहे.
चांदणी चौक, मार्केट यार्ड चौक मार्गे पुणेकडे जाणारी सर्व वाहने कोठी चौक-महात्मा फुले चौक चाणक्य चौक-सक्कर चौकमार्गे जातील. तसेच पुणेकडून सक्कर चौक-माळीवाडा मार्केटयार्डमार्गे छत्रपती संभाजीनगरकडे जाणारी वाहने सक्कर चौक-चाणक्य चौक-महात्मा फुले चौक-कोठी चौकमार्गे जातील. पोलिस अधीक्षक सोमनाथ घार्गे यांनी तसे आदेश काढले आहेत.
