नगर: सावेडीतील पाईपलाईन रस्ता परिसरात रविवारी व्यावसायिक चिरंजीव दत्तात्रय गाढवे (वय 31) यांच्यावर झालेला हल्ला व हवेत गोळीबार प्रकरणात तोफखाना पोलिसांनी भिंगार परिसरातील दोन अल्पवयीन मुलांना ताब्यात घेतले आहे. त्यांनी आणखी दोन साथीदारांच्या मदतीने गुन्हा केल्याची कबुली दिली आहे.
मात्र, उर्वरित दोन संशयित आरोपी अद्याप पसार असून पोलिसांकडून त्यांचा शोध सुरू आहे. ताब्यात घेतलेल्या मुलांकडून गुन्ह्यात वापरलेली दुचाकी जप्त करण्यात आली असून, त्यांची रवानगी बालसुधारगृहात करण्यात आली आहे.
गाढवे 24 मे रोजी सकाळी मित्रासोबत पाईपलाईन रस्त्यावरील चहाच्या दुकानात थांबले असताना तीन ते चार जणांच्या टोळक्याने त्यांच्यावर हल्ला केला. यातील एका हल्लेखोराने धारदार शस्त्राने त्यांच्या पाठीवर वार केला.
त्यानंतर दुकानात घुसून मारहाण करण्यात आली. हल्ल्यानंतर संशयितांनी पळ काढताना हवेत गोळीबार केल्याचे फिर्यादीत नमूद आहे. घटनेनंतर पोलिसांनी परिसरातील सीसीटीव्ही फुटेज तपासल्यानंतर चार संशयित एका दुचाकीवरून आल्याचे निष्पन्न झाले.
तांत्रिक तपास व माहितीच्या आधारे पोलिसांनी एकाला पाथर्डीतून व दुसऱ्याला भिंगारमधून ताब्यात घेतले. चौकशीत त्यांनी भिंगारमधील आणखी दोन साथीदारांसह गुन्हा केल्याची कबुली दिली आहे.
