जळगाव, पुढारी वृत्तसेवा
हा कुठला शिवसेनेचा आमदार… हा तर अपक्ष आमदार आहे. राष्ट्रवादी काँग्रेसच्या पाठिंब्यामुळे निवडूण आलेला आहे. रोहिणी खडसेंवरील झालेल्या हल्ल्याची सखोल चौकशी केल्यास अनेक महिलांच्या अत्याचाराची प्रकरणे समोर येतील. अश्या शब्दांत माजी मंत्री एकनाथ खडसे यांनी आमदार चंद्रकांत पाटलांवर हल्लाबोल केला.
सोमवार २७ डिसेंबर रोजी जिल्हा बँकेच्या माजी अध्यक्षा रोहिणी खडसे यांच्या कारवर जीवघेणा हल्ला करण्यात आला होता. यात शिवसेनेचे कार्यकर्ते असल्याचा आरोप रोहिणी खडसे यांनी सकाळी झालेल्या पत्रकार परिषदेत केला. त्यावेळी माजी मंत्री एकनाथ खडसे यांनी हल्ल्याचा तीव्र निषेध करत आमदार चंद्रकांत पाटलांवर हल्लाबोल केला.
यावेळी खडसे म्हणाले की, चंद्रकांत पाटील हा शिवसेनेचा आमदार नाही. हा अपक्ष आमदार आहे. राष्ट्रवादी काँग्रेसचे जिल्हाध्यक्ष रविंद्रभैय्या पाटील यांच्यामुळे तो निवडून आलेला आहे. एकीकडे शिवसेनेचा जिल्हाप्रमुख म्हणवतो आणि दुसरीकडे अपक्ष आमदार असल्याचे सांगतो.
युतीशी गद्दारी करून निवडून आलेला हा आमदार आहे. यापुर्वीच्या पार्श्वभूमीची चौकशी करावी, एका महिलेवर आणि मुलीवर अत्याचार केला असून, त्याची सखोल चौकशी केल्यास महिलांवरील अत्याचाराची अनेक प्रकरणे बाहेर येतील. यातील ऑडिओ क्लिपमध्ये महिलांबाबतचे अनेक अश्लिल संदर्भ आहेत. यापुर्वी अनेक भाषणांमध्ये गुंडप्रवृत्तीच्या लोकांवर आळा घालण्याबाबत आपण बोललो होतो. आता नेमकं तेच घडत असल्याचे त्यांनी यावेळी सांगितले.
हेही वाचा
