सटाणा : पुढारी वृत्तसेवा ; शहरातील मालेगाव रोडवर गुरुवारी (दि.१७) चालकाचे नियंत्रण सुटल्याने कारच्या दुहेरी अपघातात (Satana accident) दुचाकीवरील महिला ठार झाली. सकाळी अकरा वाजता घडलेल्या घटनेचा थरार सीसीटीव्हीत कैद झाला असून परिसरातून हळहळ व्यक्त होत आहे.
मालेगाव रोडवर मारुती कार (क्र.एम. एच.४१ए६७२५) वरील चालकाचे नियंत्रण सुटल्याने कारने समोरून येणारी मनसे शहराध्यक्ष पंकज सोनवणे यांच्या कारला प्रथम धडक दिली. त्यानंतर पुढे चालणारी मोटरसायकल (क्र.एम.एच.४१झेड४७९३) हिस पाठीमागून जोरदार धडक दिली. दुचाकीस्वार प्रशांत सोनवणे एका बाजूला फेकले गेले तर पाठीमागे बसलेल्या त्यांच्या आई निर्मला सोनवणे या कारच्या पुढील चाकात सापडल्या. कारने त्यांना काही अंतर फरफटत नेले. प्रत्यक्षदर्शींनी तात्काळ कार उचलून खालून त्यांना बाहेर काढून शहरातील अपेक्स रुग्णालयात दाखल केले. (Satana accident)
याबाबत माहिती मिळताच रुग्णालय परिसरात प्रचंड गर्दी जमली होती. त्यामुळे परिसरात पोलिस बंदोबस्तही तैनात करण्यात आला होता. उपचारादरम्यान निर्मला सोनवणे यांचे काही तासांनी दुर्दैवी निधन झाले. या अपघाताचा थरार सीसीटीव्हीत कैद झाला असून सर्वत्र हळहळ व्यक्त होत आहे.
