मुंबई; पुढारी वृत्तसेवा : एमएमआरडीएला मुंबई महानगर क्षेत्रात विविध प्रकल्प राबविण्यासाठी 60 हजार कोटींपर्यंतचे कर्ज उभारण्यास राज्य मंत्रिमंडळाने शनिवारी मान्यता दिली. तसेच यातील 12 हजार कोटी रुपयांच्या बँक कर्जास शासन हमी देण्यात आली आहे.
एमएमआरडीएकडून मुंबई महानगर क्षेत्रात विविध प्रकल्प सुरू असून त्यासाठी आर्थिक चणचण भासत आहे. त्यामुळे सदर प्रकल्प वेगाने मार्गी लावण्यासाठी हे कर्ज काढण्याची परवानगी एमएमआरडीएला दिली आहे. या कर्जापैकी पहिल्या टप्प्यात उभारण्यात येणार्या 12 हजार कोटी रकमेच्या कर्जास शासन हमी देणार आहे. या शासन हमीवरील मुद्रांक शुल्क माफ करण्याचा निर्णय घेण्यात आला आहे.
मुंबई महानगर प्रदेश विकास प्राधिकरणामार्फत मुंबई महानगर क्षेत्रात 1 लाख 74 हजार 940 कोटी किमतीचे महत्त्वाकांक्षी पायाभूत प्रकल्प हाती घेण्यात आले आहेत. यामध्ये विविध मेट्रो रेल प्रकल्प, बोरिवली-ठाणे भुयारी मार्ग, ठाणे कोस्टल रोड व शिवडी-वरळी कनेक्टर, इत्यादी महत्त्वाच्या प्रकल्पांचा समावेश आहे. प्राधिकरणामार्फत हाती घेण्यात आलेल्या या प्रकल्पांना निधी उपलब्ध होऊन प्रकल्प वेळेत पूर्ण करण्याच्या दृष्टीने कर्ज काढण्यास मान्यता देण्यात आली आहे.
मुंबई महानगर प्रदेश विकास प्राधिकरण कायद्यातील कलम 21नुसार प्रकल्पांसाठी कर्ज काढताना राज्य सरकारची परवानगी घेणे बंधनकारक आहे. शासनाची पूर्वमान्यता घेण्याची तरतूद विचारात घेता महत्त्वाकांक्षी प्रकल्प पूर्ण करण्यासाठी प्राधिकरणास आवश्यकतेनुसार 60 हजार कोटी पर्यंतचे कर्ज उभारण्यास शासनाची मान्यता देण्यात आली आहे.
