मुंबई : आरे कारशेडला विरोध कायम

जोगेश्वरी; पुढारी वार्ताहर :  गोरेगाव आरे जंगलातील कारशेडला पर्यावरण प्रेमी संघटनांकडून विरोध सुरूच असून राज्यात सत्तांतर झाल्यापासून 'आरे जंगल बचाव' मोहीमेने अधिक जोर पकडला आहे. सलग नऊ रविवारी कारशेडविरोधात पर्यावरणप्रेमींनी आंदोलन करून राज्य सरकारविरोधात जोरदार घोषणाबाजी केली.

मेट्रो कारशेडचे काम सुरू असल्यामुळे पर्यावरणप्रेमींनी नाराजी व्यक्त केली. आरे जंगल वाचवावा, या मागणीसाठी पर्यावरणप्रेमींकडून प्रत्येक रविवारी आंदोलन करण्यात येत आहेत.  मुख्यमंत्री एकनाथ शिंदे यांच्या घरावर देखील आंदोलन करण्यात आले होते. रविवारी सकाळी आरे बिरसा मुंडा चौकात आंदोलक जमा झाल्याचे पाहायला मिळाले. आंदोलकांनी हातात पोस्टर घेऊन जोरदार घोषणाबाजी केली.

• मागील काही आठवड्यापासून कारशेड विरोधात आंदोलनाची धार कमी होताना पाहायला मिळत आहे. या रविवारी जवळपास
  25 ते 30 पर्यावरणप्रेमींमार्फत आंदोलन सुरू होते.
• आरे बचाव मोहिमेमधील महत्वाचे आंदोलनकर्ते दिसून आले नाहीत. त्यामुळे यापुढे आरे कारशेड विरोधात आंदोलनाची दिशा कशाप्रकारे असेल याबाबत प्रश्नचिन्ह निर्माण होत आहे.
• आंदोलना दरम्यान कोणताही अनुचित प्रकार घडू नये, यासाठी रविवारी आंदोलनाच्या ठिकाणी मोठा
  पोलीस बंदोबस्त देखील तैनात करण्यात आल्याचे पहायला मिळाले.