मुंबई: वरळी बीडीडी चाळीतील गॅस सिलिंडर स्फोटात गंभीररीत्या भाजलेल्या चार महिन्यांच्या चिमुकल्याच्या मृत्यूनंतर नायर रुग्णालयातील कथित वैद्यकीय निष्काळजीपणाचा प्रकार समोर आला.
रुग्णालयातील जखमी रुग्णांकडे वैद्यकीय कर्मचारी दुर्लक्ष करत असल्याचा व्हिडिओ सोशल मीडियावर व्हायरल झाल्यानंतर महापालिका प्रशासनाने दोन डॉक्टर आणि एका परिचारिकेला निलंबित केले.
या घटनेची गंभीर दखल घेत तत्कालीन अतिरिक्त महापालिका आयुक्त सुरेश काकाणी यांनी तातडीने चौकशीचे आदेश दिले. भाजलेल्या रुग्णांवर उपचार करणाऱ्या महापालिका रुग्णालयातील डॉक्टरांचा समावेश असलेली समिती स्थापन करून सात ते आठ दिवसांत अहवाल सादर करण्याचे निर्देश देण्यात आले.
व्हायरल व्हिडिओमुळे प्रशासनावर टीकेची झोड
व्हायरल झालेल्या चित्रफितीत चार जखमी रुग्ण उपचाराच्या प्रतीक्षेत असल्याचे आणि त्यांच्याकडे वैद्यकीय कर्मचारी लक्ष देत नसल्याचे दिसत होते. या प्रकारावरून महापालिका प्रशासनावर टीकेची झोड उठली. प्राथमिकदृष्ट्या वैद्यकीय कर्मचाऱ्यांचे वर्तन चुकीचे असल्याचे तत्कालीन अतिरिक्त महापालिका आयुक्त संजीव कुमार यांनी स्पष्ट केले.
नुकसानभरपाई देण्याची मागणी
महापालिका स्थायी समितीच्या बैठकीतही या प्रकरणावरून जोरदार चर्चा झाली. दोषींवर कठोर कारवाई करण्याची मागणी करण्यात आली. मृत चिमुकल्याच्या कुटुंबीयांना २५ लाख रुपयांची नुकसानभरपाई देण्याची मागणीही करण्यात आली. नायर रुग्णालयाच्या अचानक पाहणीदरम्यान ३४ विभागप्रमुखांपैकी केवळ दोन जण रुग्णालयात उपस्थित असल्याचा आरोप भाजप नगरसेवकांनी केला.
