पुढारी ऑनलाईन डेस्क : बीड लोकसभा निवडणुकीत धक्कादायकरित्या पराभव झाल्यानंतर भाजपच्या नेत्या व माजी मंत्री पंकजा मुंडे यांना पक्षाने विधान परिषदेसाठी उमेदवारी दिली आहे. यावर प्रतिक्रिया देताना मी विधानपरिषदेसाठी उमेदवारी दाखल करणार आहे. लोकसभा निवडणुकीत चांगली लढत देऊनही मला काही मतांनी पराभव स्वीकारावा लागला. मला संधी दिल्याबद्दल मी पक्षाच्या सर्वोच्च नेतृत्वाचे आभार मानते, असे पंकजा मुंडे यांनी म्हटले आहे.
दरम्यान, विधानपरिषद निवडणुकीचा उमेदवारी अर्ज दाखल करण्यापूर्वी पंकजा मुंडे यांनी आज (दि.२) सकाळी श्री सिध्दिविनायकाचे मनोभावे दर्शन घेतले. त्यानंतर निवासस्थानी आईने व कुटुंबातील सदस्यांनी औक्षण केले. यावेळी राज्यभरातून आलेल्या कार्यकर्त्यांच्या शुभेच्छा स्वीकारून त्या विधानभवनाकडे रवाना झाल्या.
२०१९ पासून राजकीय वनवास सहन करणाऱ्या आणि नुकत्याच झालेल्या लोकसभा निवडणुकीत पराभवाचा धक्का बसलेल्या पंकजा मुंडे यांचे भाजपश्रेष्ठींनी राजकीय पुनर्वसन केले आहे. १२ जुलैला होणाऱ्या विधान परिषदेच्या निवडणुकांसाठी भाजपने पंकजा मुंडे यांना उमेदवारी दिली आहे.
