मुंबई : दक्षिण मुंबईतील कोस्टल रोडवर रविवारी भल्या पहाटे भीषण अपघातात अनियंत्रित झालेली आलिशान कार उड्डाणपुलावरून कोसळून तीन तरुणांचा मृत्यू झाला. एक तरुण गंभीर जखमी असून काळजाचा ठोका चुकवणाऱ्या या अपघाताचे सीसीटीव्ही फुटेजही समोर आले आहे.
कारमधील चारही तरुण अहमदाबादेतील (गुजरात) रहिवासी होते. त्यातील तिघे इंजिनिअरिंगचे, तर एक आर्किटेक्चरचा विद्यार्थी होता. हे सर्वजण शिक्षणासाठी मुंबईत वास्तव्याला होते. अपघाताची माहिती त्यांच्या कुटुंबीयांना देण्यात आली आहे. या दुर्घटनेत शानय गज्जल, धीर्या सेठ आणि एका २५ वर्षीय अनोळखी तरुणाचा मृत्यू झाला आहे. आदित्य ओस्वाल हा गंभीर जखमी झाला असून त्याच्यावर अतिदक्षता विभागात उपचार सुरू आहेत. त्याची प्रकृती चिंताजनक असल्याचे वैद्यकीय सूत्रांनी सांगितले. अपघातग्रस्त कार दीव-दमणमधील सिल्वासा येथील पासिंगची आहे.
पोलिसांनी दिलेल्या माहितीनुसार ही कार सुसाट निघाली होती. कोस्टल रोडवरील लोटस जेटीजवळ आल्यावर ती अनियंत्रित झाली आणि उड्डाणपुलाच्या कठड्याला जोरात धडकली. यावेळी कारचा वेग इतका होता की, कठड्याला लागून असलेला विजेचा खांब तोडून ती तब्बल ७५ फूट खाली कोसळली.
८ मार्च २०२६ : पहाटे काही दुचाकीस्वारांनी कोस्टल रोडवर बेकायदा प्रवेश करून वेगाने वाहने चालविल्याचे सीसीटीव्हीत आढळले. पोलिसांनी कारवाई केली.
२६ ऑगस्ट : कोस्टल रोडवर १६ वाहने वेगमर्यादा ओलांडताना आढळली. पोलिसांनी कारवाई केली.
३ सप्टेंबर : बोगद्यात लॅम्बोर्गिनी, बीएमडब्ल्यूसह महागड्या वाहनांची कथित रेसिंग समोर आली. मरिन ड्राइव्ह पोलिसांनी गुन्हा दाखल केला.
८ सप्टेंबर : वेगमर्यादा उल्लंघनाच्या १६ पैकी ११ वाहने जप्त करण्यात आली.
२० सप्टेंबर : लोटस जेट्टीजवळ बीएमडब्ल्यू पुलाच्या कठड्यावरून खाली कोसळली. तिघांचा मृत्यू, एक गंभीर जखमी.
