Mumbai Police
मुंबई: बॉलिवूड अभिनेता सलमान खानच्या गॅलेक्सी अपार्टमेंटबाहेरील सुरक्षा बंदोबस्तावर तैनात असलेल्या मुंबई पोलिसांच्या एका कर्मचाऱ्याचा ड्युटीदरम्यान मृत्यू झाला. प्राथमिक माहितीनुसार, हृदयविकाराच्या झटक्याने मृत्यू झाल्याचा संशय व्यक्त केला जात आहे. गणेश रायते (वय ४१) असे मृत पोलीस शिपायाचे नाव आहे.
मुंबई पोलिसांच्या वरिष्ठ अधिकाऱ्यांनी दिलेल्या माहितीनुसार, पोलीस शिपाई गणेश रायते हे शुक्रवारी सायंकाळी सुमारे ६ वाजता गॅलेक्सी अपार्टमेंटबाहेर सुरक्षा ड्युटीवर तैनात होते. याच दरम्यान त्यांना अचानक अस्वस्थ वाटू लागले आणि ते खाली कोसळले.
घटनास्थळी उपस्थित असलेल्या सहकाऱ्यांनी त्यांना तातडीने वांद्रे येथील भाभा रुग्णालयाच्या आपत्कालीन विभागात दाखल केले. मात्र, डॉक्टरांनी तपासणीनंतर त्यांना मृत घोषित केले.
गणेश रायते हे मुंबई पोलिसांच्या LA-4 युनिटमध्ये कार्यरत होते. त्यांच्या मृत्यूचे नेमके कारण अद्याप स्पष्ट झालेले नाही. प्राथमिक माहितीनुसार हृदयविकाराचा झटका आल्याची शक्यता वर्तवली जात असली, तरी शवविच्छेदन अहवालानंतरच मृत्यूचे निश्चित कारण स्पष्ट होणार आहे.
