मुंबई: दादर येथील विद्यार्थी आंदोलनादरम्यान पोलिसांच्या वाहनासमोर उभे राहिल्यामुळे चर्चेत आलेली मॉडेल रिया यादव हिने आता महाराष्ट्र सायबर सेलकडे ऑनलाइन छळ, ट्रोलिंग, बदनामी आणि धमक्यांबाबत तक्रार दाखल केली आहे.
तिच्या तक्रारीवर प्राथमिक पडताळणी सुरू असून, त्यानंतर पुढील कायदेशीर कारवाईबाबत निर्णय घेतला जाणार आहे. रिया अहिरचा पोलिसांच्या वाहनासमोर उभा असलेला व्हिडिओ सोशल मीडियावर मोठ्या प्रमाणात व्हायरल झाला होता.
त्यानंतर तिच्याविरोधात अपमानास्पद पोस्ट, महिलांचा अवमान करणाऱ्या टिप्पणी, बदनामीकारक मजकूर आणि मॉर्फ केलेले फोटो प्रसारित करण्याच्या धमक्या मिळाल्याचा आरोप तिने केला आहे. त्यामुळे संबंधित सोशल मीडिया खात्यांवर एफआयआर नोंदवून कारवाई करण्याची मागणी तिने केली आहे.
रियाने माध्यमांशी बोलताना सांगितले की, सततच्या ऑनलाइन छळामुळे मानसिक त्रास होत असून महिलांना लक्ष्य करणाऱ्यांविरोधात कठोर कारवाई होणे आवश्यक आहे. अशा प्रकारच्या ट्रोलिंगमुळे इतर महिलाही सार्वजनिक प्रश्नांवर बोलण्यास घाबरतात, असेही तिने नमूद केले.
