मुंबई : मुंबई महानगरपालिकेतील सफाई कामगारांना मालकी हक्काची घरे मिळावीत, यासाठी सोमवारी, 23 मार्च रोजी असंख्य सफाई कामगार मुख्यमंत्री देवेंद्र फडणवीस यांच्या वर्षा निवासस्थानी धडकणार असल्याची माहिती म्युनिसिपल मजदूर युनियने दिली.
आशिया खंडात सर्वात श्रीमंत असलेल्या मुंबई महापालिकेने अर्थसंकल्पात रस्ते, ब्रीज, रुग्णालये आदिसाठी निधीची तरतूद केलेली आहे. परंतु सफाई कामगारांना मालकी हक्काची घरे देण्यासाठी कोणतीही निधीची तरतूद केलेली नाही. महानगरपालिकेच्या 46 वसाहती सदर वसाहतीमधील सदनिका धोकादायक झाल्या आहेत. देखभाल न केल्याने 46 वसाहतीपैकी 36 वसाहती जीर्ण झालेल्या अवस्थेत आहेत. त्या कधीही कोसळू शकतील, अशी परिस्थिती आहे.
महापालिकेने सदर वसाहतीसाठी विशेष निधी मंजुर करून तिची पुर्नबांधणी करण्याची मागणी युनियनकडून करण्यात आली. सफाई कामगारांना मालकी हक्काची घरे मिळावीत, म्हणून सर्व चौक्यावर, प्रत्येक वसाहतीमध्ये सभा व प्रचार करण्यात आला आहे. यांची सुरुवात 10 मार्च रोजी शिशमहल वसाहतीपासून करण्यात आली आहे.
याकरिता दरदिवशी प्रत्येक वसाहतीमध्ये रात्रीच्या वेळी सभा घेवून मालकी हक्काच्या घरांसाठी समस्त कामगारांच्या कुटुंबांसह 23 मार्च 2026 रोजी वर्षा बंगल्यावर मुख्यमंत्री देवेंद्र फडणवीस यांना भेटण्यासाठी उपस्थित राहण्याचे आवाहन म्युनिसिपल मजदूर युनियनचे अध्यक्ष अशोक जाधव आणि सरचिटणीस वामन कविस्कर यांनी केले आहे.
