Mumbai Rain Updates : दुपारपासून मुंबई आणि उपनगरांमध्ये आज (दि. ५) सकाळपासून घेतलेल्या काहीशा उसंतीनंतर वादळी वाऱ्यासह मुसळधार पावसाने जोरदार पुनरागमन केले आहे. मुंबई शहर, पूर्व-पश्चिम उपनगरे आणि नवी मुंबई परिसराला पावसाने झोडपून काढले असून, अनेक ठिकाणी सखल भागात पाणी साचण्यास सुरुवात झाली आहे. अनेक ठिकाणी झाडे कोसळली. भारतीय हवामान खात्याने (IMD) आज मुंबईसाठी 'रेड अलर्ट' (अतिवृष्टीचा इशारा) जारी केला असून नागरिकांना सतर्क राहण्याचे आवाहन केले आहे.
आज सकाळी ९:०० ते साधारण १०:३०-११:०० वाजेपर्यंत पावसाने काहीशी उसंत घेतली होती. अनेक ठिकाणी केवळ रिमझिम पाऊस सुरू होता. मात्र, त्यानंतर अचानक हवामानात बदल होऊन ५५ ते ६५ किमी प्रतितास वेगाने वाहणाऱ्या सोसाट्याच्या वाऱ्यासह पावसाचा जोर वाढला. सध्या दादर, माटुंगा, सायन, परळ, विक्रोळी आणि भांडुप या भागात मुसळधार पाऊस बरसत आहे. नवी मुंबईतही वादळी वाऱ्यासह जोरदार पाऊस सुरू आहे.
पावसाचा जोर वाढल्यामुळे दादर टीटी आणि परळ परिसरातील रस्त्यांवर पाणी साचायला (Water Logging) सुरुवात झाली आहे. दादर टीटीकडून थेट परळकडे जाणाऱ्या रस्त्याच्या मधोमध एक मोठे झाड कोसळल्याची घटना घडली. यामुळे या मार्गावरील वाहतुकीवर काहीसा परिणाम झाला. मात्र, बृहन्मुंबई महानगरपालिका (BMC) प्रशासनाने तात्काळ मोहीम राबवून हे झाड बाजूला काढण्याचे काम युद्धपातळीवर सुरू केले आहे.
एकीकडे पावसाने मुंबईकरांची धांदल उडवली असली, तरी दुसरीकडे जलसंकटाच्या पार्श्वभूमीवर अत्यंत दिलासादायक बातमी समोर आली आहे. मुंबईला पाणीपुरवठा करणाऱ्या ७ प्रमुख जलाशयांमध्ये गेल्या २४ तासांत तब्बल ३.७८% पाणीसाठ्याची वाढ झाली आहे. यामुळे आता एकूण उपयुक्त पाणीसाठा १३.१९% वर पोहोचला असून, यामुळे मुंबईकरांना मोठा दिलासा मिळाला आहे.
बृहन्मुंबई महानगरपालिकेने दिलेल्या माहितीनुसार, मुंबईत संततधार पाऊस सुरू असला तरी पालिकेची संपूर्ण आपत्कालीन यंत्रणा प्रत्यक्ष कार्यस्थळी (On-ground) सज्ज असून अहोरात्र कार्यरत आहे. सध्या लोकल रेल्वे, बेस्ट (BEST) बस आणि इतर सार्वजनिक वाहतूक सेवा सुरळीत सुरू असून मुंबईतील जनजीवन नियमितपणे सुरू आहे.
घराबाहेर पडणे टाळा: हवामान खात्याच्या अतिवृष्टीच्या पार्श्वभूमीवर नागरिकांनी अत्यंत अत्यावश्यक काम असेल तरच घराबाहेर पडावे.
झाडांखाली थांबू नका: सोसाट्याचा वारा वाहत असल्याने नागरिकांनी झाडांखाली उभे राहू नये तसेच आपली वाहनेही झाडांखाली पार्क करू नयेत.
हेल्पलाइन क्रमांक: कोणत्याही आपत्कालीन परिस्थितीत तात्काळ मदतीसाठी महानगरपालिकेच्या १९१६ या आपत्कालीन मदतसेवा क्रमांकावर संपर्क साधावा.
प्रशासनाकडून वेळोवेळी दिल्या जाणाऱ्या सूचनांचे काटेकोरपणे पालन करण्याचे आवाहन करण्यात आले आहे.
