मुंबई: मुंबई शहर व उपनगरांत पाऊस सक्रिय झाला असून सोमवारी दिवसभर तुरळक पावसासह जोरदार सरी पडल्या. काही सखल भाग वगळता फारसे पाणी तुंबले नाही. मात्र पावसामुळे वाहतूक मंदावली होती. पश्चिम व मध्य रेल्वेच्या लोकलही ५ ते १० मिनिटे विलंबाने धावत होत्या.
मुंबईत गेल्या आठवड्यात पूर्णपणे विश्रांती घेतलेल्या पावसाने शनिवारपासून पुन्हा हजेरी लावली आहे. सोमवारी संपूर्ण शहरात पाऊस सक्रिय झाला.
काही भागात वाऱ्यासह पावसाच्या जोरदार सरी पडल्या. शहर व पूर्व उपनगरांत पावसाचा जोर जास्त होता. यात १८ ठिकाणी झाडे व झाडाच्या फांद्या पडल्या. ७ ठिकाणी शॉर्टसर्किटच्या किरकोळ घटना घडल्या. तर पाच ठिकाणी घराच्या भिंती पडल्या, मात्र यात कुणालाही मार लागला नाही.
अधूनमधून पडलेल्या जोरदार सरी व धुरकट वातावरणामुळे वाहनांचा वेग मंदावून दक्षिण मुंबईसह सायन, चेंबूर, मानखुर्द जंक्शन, पश्चिम द्रुतगती महामार्ग, एस. व्ही. रोड, अन्य ठिकाणी वाहतूक कोंडी झाली होती. विरार-चर्चगेट व कल्याण-सीएसएमटी मार्गावरील लोकल ५ ते १० मिनिटे विलंबाने धावत होत्या.
