मुंबई : मुंबई-पुणे मिसिंग लिंक प्रकल्प महाराष्ट्र दिनी सुरू करण्याचे नियोजन असून त्यादृष्टीने कामांना वेग देण्यात आला आहे. या प्रकल्पातील अखेरच्या दरीपुलाचे बांधकाम पूर्ण झाले असून आता त्याच्या खांबांवर रंगकाम सुरू करण्यात आले आहे.
मुंबई-पुणे द्रुतगती महामार्ग हा एकूण 94.5 किमी लांबीचा रस्ता आहे. द्रुतगती महामार्ग आणि राष्ट्रीय महामार्ग 4 हे दोन्ही रस्ते खालापूर टोल प्लाझा येथे एकत्र येतात आणि खंडाळा एक्झिट येथे वेगळे होतात. या भागात मोठ्या प्रमाणावर वाहतूक कोंडी होते.
त्यामुळे द्रुतगती मार्गावरील खोपोली एक्झिट ते सिंहगड इन्स्टिट्यूट या भागात 13 किमीचा मिसिंग लिंक उभारण्याचे काम महाराष्ट्र राज्य रस्ते विकास महामंडळातर्फे (एमएसआरडीसी) करण्यात येत आहे. मिसिंग लिंक उभारण्याचे काम 2019 साली सुरू करण्यात आले होते.
सध्या ज्या परिसरात मिसिंग लिंक उभारला जात आहे तो भाग द्रुतगती मार्गावरून पार करताना लोणावळा आणि खंडाळा घाट ओलांडावा लागतो. नागमोडी वळणांमुळे हे अंतर 19 किमीचे आहे. मिसिंग लिंकमुळे हा प्रवास 6 किमीने कमी होईल. शेवटच्या 650 मीटरच्या केबल स्टेड पुलाचे काम गेल्या काही महिन्यांपासून सुरू होते. त्याची जोडणी आता पूर्ण झाली आहे.
