मुंबई: महापौर बंगला दुरुस्ती, स्वीय सहाय्यक यांना महिन्याला ५० हजार वेतन यासाठी करोडो रूपये खर्च सुरु असतांना, आता महापौर रितू तावडे यांचे सोशल मिडिया हाताळणीकरिता एका वर्षासाठी २५ लाख रुपयांचा निधी खर्च करण्यात येणार आहे. तसा प्रशासनाने तयार केला असून प्रस्ताव स्थायी समितीसमोर मंजुरीसाठी येणार आहे.
मुंबईच्या महापौर रितू तावडे यांच्या कामकाज, कार्यक्रमातील उपस्थिती तसेच त्यांचा सहभाग आदींची माहिती विविध समाजमाध्यमांद्वारे जनतेपर्यंत पोहोचली जावी, यासाठी महापौर कार्यालयासाठी समाजमाध्यम हाताळणीकरता व्यवस्था करण्यात आली आहे. यासाठी महापालिकेच्यावतीने संस्थेची निवड करण्यात आली असून एक वर्षांच्या कालावधीसाठी २५ लाख रुपये खर्च केले जाणार आहेत.
रनटाईम सोल्यूशन्सची निवड
महापौर रितू तावडे यांचे दैनंदिन कार्यक्रम,भेटी-गाठी, पाहणी दौरे सोशल मिडियावर सर्वत्र प्रसिद्ध करण्यासाठी महापौर कार्यालयासाठी एक टिम तैनात करण्यात आली आहे. या टिमची मुदत वाढवण्यात आली आहे .१ ऑगस्ट २०२६ ते ३१ जुलै २०२७ या कालावधीत या टीमची सेवा घेतली जाणार आहे. याबाबतचा प्रस्ताव स्थायी समितीच्या बैठकीपुढे मान्यतेसाठी ठेवण्यात येणार आहे. यासाठी २५ लाख १२ हजार ७८६ रुपयांचा खर्च केला जाणार आहे.
