मुंबई: मुंबईतील जागांचे वाढते दर पाहाता येथील श्रीमंत ग्राहकवर्गालाही मोठी घरे परवडेनाशी झाली आहेत. परिणामी, ३ बीएचके घरांच्या मागणीत देशभरातील मोठ्या शहरांचा विचार करता महामुंबईचा क्रमांक सर्वात शेवटी येतो. ३ बीएचके घरांना येथे सर्वात कमी मागणी आहे.
देशभरातील १४ शहरांमधील ८ हजार ३२० ग्राहकांशी अनारॉकने संवाद साधला. यापैकी ४८ टक्के ग्राहकांनी ३ बीएचके घरांना पसंती दिली आहे.
त्यांचे बजेट ९० लाख ते दीड कोटींच्या दरम्यान आहे. ३८ टक्के ग्राहकांनी २ बीएचकेला पसंती दिली आहे. ४ बीएचके आणि त्यापेक्षा मोठ्या घरांना २०२४च्या पहिल्या सहामाहीत ३ टक्के प्राधान्य होते. आता हे प्रमाण ५ टक्क्यांपर्यंत वाढले आहे.
घर खरेदी करताना ३ बीएचकेला प्राधान्य देणाऱ्या ग्राहकांमध्ये अहमदाबादचा क्रमांक सर्वात वरचा आहे. येथे ५७ टक्के ग्राहक ३ बीएचके पसंत करतात. चेन्नई आणि दिल्ली येथे हे प्रमाण ५३ टक्के तर हैदराबाद येथे ५२ टक्के आहे. बंगळुरू आणि कोलकाता येथील ४६ टक्के ग्राहकांचा कल ३ बीएचके घरांकडे आहे.
महाराष्ट्राचा विचार केला तर पुण्यात या प्रकारच्या सदनिकांना ४७ टक्के मागणी आहे. मुंबईत मात्र दर चौरस फुटाची किंमत वेगाने वाढत असून ग्राहक लहान घरांकडे वळत आहेत. महामुंबईत ३ बीएचके घरांना सर्वात कमी म्हणजेच केवळ ३९ टक्के मागणी आहे.
