मुंबई : पुढारी वृत्तसेवा : शूटिंग वरून घरी परतताना मराठी अभिनेत्री उर्मिला कोठारेच्या कारचा भीषण अपघात झाला. यात दोन मजुरांना उडवले. एकाचा मृत्यू झाला आहे. तर एक जण गंभीर जखमी आहे. ही घटना मुंबईतील कांदिवली परिसरातील पोईसर मेट्रो स्टेशनजवळ शुक्रवारी रात्री घडली. उर्मिला आणि तिचा ड्रायव्हरही या अपघातात जखमी झाल्याची माहिती मिळत आहे.
पोलिसांनी सांगितले की, या घटनेत अभिनेत्री उर्मिला कोठारे देखील जखमी झाली असून ती शूटिंग संपवून घरी परतत होती. गाडीची एअर बॅग योग्य वेळी उघडल्याने तिचा जीव वाचला. मेट्रोमध्ये काम करणाऱ्या दोन मजुरांना भरधाव कारने धडक दिली, या घटनेत एका मजुराचा मृत्यू झाला, तर दुसरा मजूर जबर जखमी झाला.
कारचा वेग जास्त असल्याने चालकाचे कारवरील नियंत्रण सुटले आणि भरधाव वेगाने जात असलेल्या कारने रस्त्याच्या कडेला काम करणाऱ्या दोन मेट्रो कर्मचाऱ्यांना धडक दिली. या घटनेत एका मजुराचा जागीच मृत्यू झाला असून दुसरा मजूर गंभीर जखमी झाला असून, त्याला जवळच्या रुग्णालयात दाखल करण्यात आले आहे.मुंबईतील समतानगर पोलिसांनी कारचालकाविरुद्ध गुन्हा दाखल करून पुढील तपास सुरू केला आहे.
