मुंबई : चालकाला सन्मानजनक मोबदला आणि प्रवाशांना सुरक्षित प्रवासाची हमी देणारे राज्य शासनाचे अधिकृत यात्री अॅप लवकरच एसटी महामंडळामार्फत सुरू करण्यात येणार आहे. या नवीन शासकीय अॅपला ‘छावा राईड अॅप’ असे नाव देण्यात आले आहे.
राज्य सरकारने मराठी तरुणांना रोजगाराच्या संधी उपलब्ध करून देणे, भरमसाट नफा कमवून प्रवासी व चालकांना वेठीस धरणार्या खासगी कंपन्यांच्या जोखडातून मुक्त करण्याच्या प्रमाणिक हेतूने आधुनिक तंत्रज्ञानावर आधारित प्रवासी अॅप बस, रिक्षा, टॅक्सी व ई-बस या वाहन सेवांसाठी सुरू करण्याचे निश्चित केले आहे. केंद्र व राज्य शासनाच्या अॅग्रीगेटेड पॉलिसीच्या आधीन राहून यात्री अॅप बनवण्याच्या अंतिम मसुद्यावर मंगळवारी मंत्रालयात चर्चा झाली.
नवीन शासकीय अॅपला ‘छावा राईड अॅप’ हे नाव द्यावे असे सर्वानुमते ठरले असून मुख्यमंत्री देवेंद्र फडणवीस व दोन्ही उपमुख्यमंत्री एकनाथ शिंदे व अजित पवार यांच्या अंतिम मान्यतेने हे अॅप लवकरच कार्यान्वित करण्यासाठी प्रयत्न केले जातील, असेही सरनाईक म्हणाले.
हे अॅप राज्य शासनाच्या परिवहन विभागाच्या सहकार्याने एसटी महामंडळामार्फत सुरू करण्यात येईल. भविष्यात एसटी महामंडळाला उत्पन्नाचा नवा स्रोत निर्माण करणे व प्रवाशांना एक विश्वासार्ह सेवा उपलब्ध करून देणे हा उद्देश समोर ठेवून हे शासकीय अॅप एसटी महामंडळाने चालवणे योग्य राहील, असे परिवहन मंत्री प्रताप सरनाईक यांनी सांगितले.
