नवी मुंबई: नवी मुंबई शहराला पाणीपुरवठा करणाऱ्या मोरबे धरणातील जलसाठा ९१.३८ टक्क्यांवर पोहोचला असून, यामुळे नवी मुंबईकरांना मोठा दिलासा मिळाला आहे. नवी मुंबई महानगरपालिकेच्या १६ ऑगस्ट २०२६ रोजीच्या पाणीपुरवठा अहवालानुसार मोरबे धरणात सध्या १७४.४३८ दशलक्ष घनमीटर (एमसीएम) पाणीसाठा असून, धरणाची एकूण साठवण क्षमता १९०.८९० एमसीएम आहे.
सध्याच्या दैनंदिन पाणीपुरवठ्याच्या प्रमाणानुसार हा उपलब्ध साठा तब्बल २९९ दिवस पुरेल, म्हणजेच ८ जून २०२७ पर्यंत नवी मुंबईला पाणीपुरवठा करता येईल, असा अंदाज महापालिकेने व्यक्त केला आहे.
मोरबे धरणाच्या पाणलोट क्षेत्रात यंदा दमदार पाऊस झाल्याने धरणातील पाणीसाठ्यात मोठी वाढ झाली आहे. आतापर्यंत २९७२ मिमी पावसाची नोंद झाली असून, गतवर्षी याच कालावधीत २३६७.६० मिमी पाऊस झाला होता. त्यामुळे यंदा गतवर्षीच्या तुलनेत सुमारे ६०४ मिमी अधिक पाऊस झाला आहे. १५ ऑगस्ट रोजी मोरबे परिसरात २६.६० मिमी पावसाची नोंद झाली.
सध्या धरणाची पाणीपातळी ८६.२८ मीटर असून धरणाची निर्धारित पातळी ८८ मीटर आहे. गतवर्षी ऑगस्ट महिन्यात मोरबे धरणात १५८.३१६ एमसीएम म्हणजेच ८२.९४ टक्के जलसाठा होता. यंदा याच कालावधीत हा साठा १७४.४३८ एमसीएम अर्थात ९१.३८ टक्क्यांवर पोहोचला आहे. त्यामुळे गतवर्षीच्या तुलनेत यंदा धरणात सुमारे १६.१२२ एमसीएम अधिक पाणीसाठा आहे.
मोरबे धरणाच्या वाढलेल्या जलसाठ्यामुळे नवी मुंबईच्या पाणीपुरवठ्याचे नियोजन अधिक सुरक्षित झाले असून, आगामी उन्हाळ्यात पाणीटंचाईची चिंता कमी होण्याची शक्यता आहे.
यंदाच्या पावसामुळे धरणाने समाधानकारक पातळी गाठली असली तरी उपलब्ध पाण्याचा काटकसरीने वापर करणे आवश्यक आहे, असे नवी मुंबई महापालिकेने म्हटले आहे. मोरबे धरणातील हा वाढता साठा नवी मुंबईच्या आगामी पाणीपुरवठ्यासाठी निश्चितच दिलासादायक ठरणार आहे.
