मुंबई : वांद्रे-कुर्ला संकुलातील 2.47 एकर जमीन दीर्घकालीन भाडेपट्ट्यावर दिल्याने एमएमआरडीएला 354 कोटी रुपये मिळणार आहेत. ज्युपिटर लाइफलाइन रुग्णालयाला ही जमीन देण्यात आल्याने लवकरच 400 खाटांचे रुग्णालय येथे उभे राहणार आहे.
वांद्रे-कुर्ला संकुलातील भूखंड एमएमआरडीएतर्फे विविध संस्थांना भाडेपट्ट्याने दिले जातात. यातून एमएमआरडीएला उत्पन्न प्राप्त होते. ज्यूपीटर रुग्णालयाचे हे सातवे रुग्णालय असेल. यामुळे रुग्णालयाची एकूण क्षमता 3 हजार खाटांची होईल. ठाणे, पुणे, इंदौर, डोंबिवली, इत्यादी ठिकाणी त्यांच्या शाखा आहेत. ज्यूपीटरप्रमाणेच नॅशनल पेमेंट्स कॉर्पोरेशन आणि नॅशनल स्टॉक एक्स्चेंजलाही वांद्रे-कुर्ला संकुलात जागा देण्यात आली आहे.
एकूण 10 हजार 26 चौरस मीटर क्षेत्रफळाचा हा भूखंड 80 वर्षांच्या कालावधीसाठी भाडेपट्ट्यावर देण्यात आला आहे. यासाठी ज्युपिटर रुग्णालयाकडून एमएमआरडीएला 354 कोटी रुपये मिळणार आहेत. त्यापैकी 25 टक्के रक्कम म्हणजेच 88.5 कोटी रुपये एमएमआरडीएला देण्यात आले आहेत. उर्वरित रक्कम वर्षभराच्या कालावधीत दिली जाईल. पुढील 24 ते 30 महिन्यांत येथे रुग्णालय उभे राहील. यासाठी रुग्णालय प्रशासनाकडून 600 कोटी गुंतवले जात आहेत.
