मुंबई : चोर समजून चार कामगारांनी केलेल्या मारहाणीत हर्षल रामसिंग परमा (वय 26) या गोरेगाव येथे एका 26 तरुणाचा मृत्यू झाल्याचे तपासात उघड झाले आहे. हत्येप्रकरणी सलमान खान, इसमुल्ला खान, गौतम चमार आणि राजीव गुप्ता अशी या चौघांना गोरेगाव पोलिसांनी अटक केली आहे.
ही घटना रविवारी पहाटे तीन ते सकाळी सातच्या सुमारास गोरेगाव येथील तीनडोंगरी, भारत हॉटेलसमोरील सुभाषनगर, राज पॅथ्रोन इमारतीमध्ये घडली. हर्षल हा त्याची आई सुवर्णा, वडिल रामसिंग परमा यांच्यासोबत गोरेगाव येथील मोतीलाल नगर परिसरात राहत होता. शनिवारी रात्री बारा वाजता तो दारु पिण्यासाठी घरातून निघून गेला होता. रात्री तीन वाजता तो गोरेगाव येथील राज पॅथ्रोन इमारतीजवळ फिरत होता.
यावेळी त्याला इमारतीमध्ये काम करणाऱ्या चार कामगारांनी पकडले. तो चोर असून तो कामगाराचे मोबाईल चोरी करण्यासाठी आला असावा असा त्याचां समज झाला होता. काही वेळानंतर ते चौघेही त्याला इमारतीजवळ घेऊन गेले. तिथेच हातपाय बांधून त्यांनी त्याला बेदम मारहाण केली होती. बांबूसह लाथ्याबुक्यांनी केलेल्या मारहाणीत हर्षल हा गंभीररीत्या जखमी झाला होता. त्यानंतर ते चारही कामगार तेथून पळून गेले होते. हा प्रकार इमारतीचा सुरक्षारक्षक पप्पू दूधनाथ यादव याच्याकडून समजताच गोरेगाव पोलिसांनी घटनास्थळी धाव घेतली होती.
मारहाणीत बेशुद्ध झालेल्या हर्षलला पोलिसांनी ट्रॉमा केअर रुग्णालयात दाखल केले होते. तिथे त्याला डॉक्टरांनी मृत घोषित केले. त्यानंतर ही माहिती त्याच्या पालकांना देण्यात आली होती. याप्रकरणी सुवर्णा परमा हिच्या तक्रारीवरुन गोरेगाव पोलिसांनी चारही आरोपीविरुद्ध हत्येचा गुन्हा दाखल केला होता. गुन्हा दाखल होताच सलमान खान, इसमुल्ला खान, गौतम चमार आणि राजीव गुप्ता या चौघांनाही पोलिसांनी अटक केली. तपासात ते चौघेही राज पॅथ्रोन इमारतीमध्ये काम करतात, दिवसा काम करुन ते सर्वजण याच इमारतीमध्ये झोपत होते.
शनिवारी पहाटे तीन वाजता त्यांना हर्षल तिथे संशयास्पद फिरताना दिसून आला, त्यांना तो चोर असल्याचा संशय आला होता. त्यामुळे हर्षलला त्यांनी पकडून इमारतीमध्ये घेऊन गेले. तिथे त्याला बांधून त्यांनी बेदम मारहाण केलीह होती. त्यात त्याचा मृत्यू झाल्याचे तपासात उघडकीस आले आहे. अटकेनंतर या चोघांनाही बोरिवलीतील स्थानिक न्यायालयात हजर करण्यात आले होते. यावेळी न्यायालयाने त्यांना पोलीस कोठडी सुनावली आहे.
