मुंबई: राज्यातील नर्सिंग अभ्यासक्रमांच्या प्रवेशासाठी महत्त्वाची मानली जाणारी सीईटी परीक्षा बुधवारपासून (6 मे) सुरू होत असून, दोन दिवस चालणाऱ्या या परीक्षेसाठी यंदा तब्बल 47 हजार 722 विद्यार्थ्यांनी नोंदणी केली आहे. बीएस्सी नर्सिंग आणि जनरल नर्सिंग अँड मिडवायफरी (जीएनएम) या अभ्यासक्रमांसाठीची ही परीक्षा 6 आणि 7 मे रोजी राज्यभर पार पडणार आहे.
राज्य सामायिक प्रवेश परीक्षा (सीईटी) कक्षामार्फत ही परीक्षा संगणकाधारित पद्धतीने घेतली जात असून, राज्यातील सर्व 36 जिल्ह्यांमध्ये एकूण 115 परीक्षा केंद्रांवर परीक्षा होणार आहे. नर्सिंग क्षेत्रातील वाढत्या संधींच्या पार्श्वभूमीवर या परीक्षेकडे विद्यार्थ्यांचा ओढा कायम असल्याचे चित्र यंदाही दिसून येत आहे.
विशेष म्हणजे, यंदाच्या परीक्षेत 1 तृतीयपंथी, 259 अनाथ आणि 110 दिव्यांग विद्यार्थ्यांचाही सहभाग आहे. गेल्या वर्षी 47 हजार 501 विद्यार्थ्यांनी नोंदणी केली होती, तर यंदा त्यात किंचित वाढ झाली आहे.
परीक्षेच्या पार्श्वभूमीवर केंद्रांवर आवश्यक सोयी-सुविधा आणि सुरक्षेची तयारी पूर्ण करण्यात आल्याचे सीईटी कक्षाकडून सांगण्यात आले आहे. विद्यार्थ्यांनी वेळेआधी केंद्रावर उपस्थित राहून नियमांचे पालन करावे, असे आवाहनही करण्यात आले आहे.
वर्षनिहाय सीईटी विद्यार्थी नोंदणी
2023-24: 31,397
2024-25: 58,663
2025-26: 47,501
2026-27: 47,722
