मुंबई: राज्यातील औद्योगिक प्रशिक्षण संस्थांमधील (आयटीआय) प्रवेश क्षमतेत यंदा वाढ झाली असून 2025-26 मधील 1 लाख 50 हजार 660 जागांच्या तुलनेत 2026-27 मध्ये प्रवेश क्षमता 1 लाख 57 हजार 664 वर पोहोचली आहे. त्यामुळे राज्यभरात एकूण 7 हजार 4 जागांची वाढ झाली असून पुणे विभागात सर्वाधिक 2 हजार 416 जागांची वाढ झाली आहे.
कौशल्य, रोजगार, उद्योजकता आणि नाविन्यता विभागाच्या व्यवसाय शिक्षण व प्रशिक्षण संचालनालयातर्फे शासकीय व खासगी औद्योगिक प्रशिक्षण संस्थांमधील प्रवेश प्रक्रियेला 21 मेपासून प्रारंभ होणार आहे. यंदा खासगी आयटीआय संस्थांमध्ये वाढलेल्या प्रवेश क्षमतेमुळे एकूण जागांमध्ये वाढ झाल्याचे दिसून येत आहे.
पुणे विभागानंतर नागपूर विभागात 1 हजार 948, तर नाशिक विभागात 1 हजार 900 जागांची वाढ झाली आहे. छत्रपती संभाजीनगर विभागात 636, अमरावती विभागात 80 आणि मुंबई विभागात 24 जागांची वाढ झाली आहे.
राज्यात यंदा शासकीय आयटीआय संस्थांची संख्या 418 इतकी कायम असली, तरी खासगी आयटीआय संस्थांमध्ये एका संस्थेची वाढ झाली आहे. गेल्या वर्षी राज्यात एकूण 1 हजार 3 आयटीआय संस्था होत्या. यंदा ही संख्या 1 हजार 4 वर पोहोचली आहे. गेल्या वर्षी राज्यातील सुमारे 1 लाख 30 हजार विद्यार्थ्यांनी आयटीआय अभ्यासक्रमांना प्रवेश घेतला होता. यामध्ये 1 लाख 8 हजार 233 मुले आणि 22 हजार 512 मुलींचा समावेश होता.
शासकीय आयटीआयमध्ये 70 हजार 271 मुले आणि 19 हजार 338 मुलींनी प्रवेश घेतला होता. तर खासगी आयटीआयमध्ये 37 हजार 961 मुले आणि 2 हजार 678 मुलींनी प्रवेश घेतला होता. विभागनिहाय प्रवेशामध्ये नाशिक विभाग आघाडीवर राहिला होता. नाशिक विभागात 25 हजार 285, पुणे विभागात 23 हजार 985, तर नागपूर विभागात 23 हजार 592 विद्यार्थ्यांनी प्रवेश घेतला होता. लोकप्रिय ट्रेडमध्ये इलेक्ट्रीशियन या अभ्यासक्रमाला सर्वाधिक पसंती मिळाली होती.
