Lok Sabha Election Survey: देशात आत्ताच्या घडीला लोकसभा निवडणूक झाली तर सत्ताधारी भाजपप्रणित एनडीएला मोठा फटका बसू शकतो, असा दावा एका सर्वेक्षणातून करण्यात आला आहे. ‘पोल ट्रॅकर’च्या नावाने सोशल मीडियावर शेअर होत असलेल्या या सर्व्हेनुसार, इंडिया आघाडीला 280 जागा मिळण्याचा, तर एनडीएला 240 जागांवर समाधान मानावं लागण्याचा अंदाज व्यक्त करण्यात आला आहे.
मात्र, हे आकडे अधिकृत निवडणूक निकाल नसून एका सर्वेक्षणातील अंदाज आहेत, हे लक्षात घेणं महत्त्वाचं आहे. या सर्वेक्षणाची स्वतंत्र पुष्टी केली नाही. त्यामुळे हे आकडे अंतिम राजकीय चित्र म्हणून पाहता येणार नाहीत.
ठाकरे गटाचे खासदार संजय राऊत यांनी या सर्व्हेचा व्हिडीओ सोशल मीडियावर शेअर केला आहे. सर्व्हेचा हवाला देत त्यांनी भाजपवर टीका केली. राऊत यांनी आपल्या पोस्टमध्ये देशात पुन्हा ‘अच्छे दिन’ येतील, असा दावा करत सत्ताधारी पक्षाला लक्ष्य केलं आहे.
‘मूड ऑफ इंडिया’ या नावाने सर्वेक्षण झाल्याचा दावा करण्यात आला आहे. या सर्व्हेमध्ये देशातील 543 लोकसभा मतदारसंघांचा समावेश असल्याचं सांगितलं जात आहे.
दाव्यानुसार, देशात लगेच लोकसभा निवडणूक झाली तर इंडिया आघाडीला 44 टक्के मतांसह 280 जागा मिळू शकतात. तर एनडीएला 40 टक्के मतांसह 240 जागा मिळण्याचा अंदाज आहे. याशिवाय इतर पक्षांना 16 टक्के मतं आणि 23 जागा मिळू शकतात, असा दावा या सर्व्हेत करण्यात आला आहे.
या सर्व्हेनुसार, देशाचा पुढील पंतप्रधान म्हणून राहुल गांधी यांना 58 टक्के लोकांनी पसंती दिल्याचा दावा करण्यात आला आहे. नरेंद्र मोदी यांच्या नावाला 11 टक्के पसंती असल्याचंही सर्व्हेत म्हटलं आहे.
तसेच मोदी सरकारच्या कामगिरीबाबतही मतदारांमध्ये नाराजी असल्याचा दावा करण्यात आला आहे. 43 टक्के लोक सरकारच्या कामावर समाधानी असल्याचं, तर 47 टक्के लोक असमाधानी असल्याचं सर्व्हेत नमूद करण्यात आलं आहे.
विरोधी पक्षनेते म्हणून राहुल गांधी यांच्या कामगिरीवर 61 टक्के लोक समाधानी असल्याचा दावा सर्व्हेत करण्यात आला आहे. तर तरुणांच्या भविष्यासाठी देशाचं नेतृत्व कोण करू शकतं, या प्रश्नावर राहुल गांधी यांना 69 टक्के आणि नरेंद्र मोदी यांना 23 टक्के पसंती असल्याचं सांगितलं जात आहे.
राजकीय सर्व्हेक्षणांमधून मतदारांचा कल समजण्याचा प्रयत्न केला जातो. मात्र सर्व्हे आणि प्रत्यक्ष निवडणुकीचे निकाल हे दोन वेगळे विषय आहेत. मतदारसंघनिहाय समीकरणं, आघाड्या, उमेदवार, मतदानाची टक्केवारी आणि निवडणुकीच्या काळातील राजकीय वातावरण यामुळे अंतिम निकाल मोठ्या प्रमाणात बदलू शकतो.
त्यामुळे 280 विरुद्ध 240 हा आकडा सध्या केवळ सर्व्हेचा अंदाज म्हणूनच पाहावा लागेल. या सर्व्हेच्या दाव्यांवरून मात्र सत्ताधारी आणि विरोधकांमध्ये राजकीय आरोप-प्रत्यारोपांना पुन्हा सुरुवात होण्याची शक्यता आहे. विशेषतः संजय राऊत यांनी हा सर्व्हे शेअर केल्यानंतर महाराष्ट्रातील राजकीय चर्चेलाही यामुळे वेगळं वळण मिळण्याची शक्यता आहे.
