मुंबई: रायगड जिल्ह्यातील कर्जत तालुक्यात टोरेंट पॉवर कंपनीच्या प्रस्तावित जलविद्युत ऊर्जा साठवण प्रकल्पासाठी होणाऱ्या वृक्षतोडीवरून राजकीय आणि पर्यावरणीय वाद निर्माण झाला आहे.
शिवसेना (उद्धव बाळासाहेब ठाकरे) पक्षाचे नेते आदित्य ठाकरे आणि अभिनेते व पर्यावरणप्रेमी सयाजी शिंदे यांनी या वृक्षतोडीला विरोध केला असून, सह्याद्रीच्या पर्यावरणाचे संरक्षण करण्याची मागणी केली आहे.
कर्जत तालुक्यातील सायडोंगर, कोतवाल खलाटी आणि पाली परिसरात प्रस्तावित असलेला हा प्रकल्प तीन हजार मेगावॉट क्षमतेचा असून, त्यासाठी सुमारे १३ हजार ५०५ कोटी रुपयांची गुंतवणूक अपेक्षित आहे.
प्रकल्पासाठी सुमारे ३७० हेक्टर क्षेत्राचा वापर आणि ३२ हजार ४८० झाडे तोडण्याची परवानगी दिल्याचे वृत्त आहे. या वृक्षतोडीमुळे जंगल, वन्यजीवांचा अधिवास आणि स्थानिक जलस्रोतांवर परिणाम होण्याची भीती पर्यावरणप्रेमींनी व्यक्त केली आहे.
आदित्य ठाकरेंचा सरकारला सवाल
आदित्य ठाकरे यांनी वृक्षतोडीवरून राज्य सरकारवर टीका केली. खासगी कंपनीच्या प्रकल्पासाठी मोठ्या प्रमाणावर झाडे तोडली जात असताना त्याला पर्यावरणपूरक कसे म्हणता येईल, असा सवाल त्यांनी उपस्थित केला. वृक्षलागवडीच्या सरकारी घोषणांचा संदर्भ देत, लावलेली झाडे नेमकी कुठे आहेत, असा प्रश्नही त्यांनी केला. कर्जत-भीमाशंकर परिसरातील जंगलतोडीची पाहणी करणार असल्याचे त्यांनी सांगितले.
सयाजी शिंदे यांची मुख्यमंत्र्यांना विनंती
‘सह्याद्रीचं वाळवंट करायचं आहे का?’ असा सवाल करत सयाजी शिंदे यांनी वृक्षतोडीबाबत संताप व्यक्त केला. सह्याद्रीतील जंगलांमुळे नद्या, पाऊस आणि जैवविविधतेला आधार मिळतो, असे सांगत त्यांनी मुख्यमंत्री देवेंद्र फडणवीस आणि वनमंत्र्यांना हस्तक्षेप करण्याचे आवाहन केले. विकासकामे करताना झाडे, पक्षी आणि वन्यजीवांचे नुकसान टाळावे, अशी मागणी त्यांनी केली.
मुख्यमंत्र्यांकडून प्रकल्पाचे समर्थन
दरम्यान, मुख्यमंत्री देवेंद्र फडणवीस यांनी प्रकल्पाला आवश्यक परवानग्या नियमानुसार मिळाल्याचे सांगत विरोधकांचे आरोप फेटाळले. वाढत्या विजेच्या मागणीसाठी स्वच्छ ऊर्जेची गरज असल्याचे नमूद करून, स्थानिकांच्या तक्रारींचा विचार केला जाईल, असेही त्यांनी स्पष्ट केले. त्यामुळे कर्जतच्या प्रकल्पावर विकास आणि पर्यावरण यांच्यातील संघर्ष अधिक तीव्र झाला आहे.
